VP SARA, OVP SECURITY CHIEF KINASUHAN

NAGHAIN ang Quezon City Police District (QCPD) ng direct assault complaint laban kay Vice President Sara Duterte at ang head ng kanyang security group sa City Prosecutor’s Office nitong Miyerkules, Nobyembre 27.

Nag-ugat ang kaso mula sa insidente ng paglipat ng nakadetine na si Office of the Vice President (OVP) chief of staff Zuleika Lopez mula Veterans Memorial Medical Center (VMMC) sa St. Luke’s Medical Center (SLMC) sa Quezon City noong Nobyembre 23.

Si QCPD Medical and Dental Unit chief Lt. Col. Jason Villamor ang tumayong complainant.

Inakusahan ng pulis ng paglabag sa Revised Penal Code in relation to direct assault, disobedience to authority, at grave coercion sina Duterte at Col. Raymun Lachica, head ng Vice Presidential Security and Protection Group (VPSPG).

Ayon kay Philippine National Police (PNP) chief General Rommel Francisco D. Marbil, ang mga kaso ay isinampa kaugnay ng insidente sa HOR Detention Center at VMMC na may kaugnayan sa pagkakadetine ni Atty. Zuleika Lopez, ang chief of staff ni Duterte.

Si Lopez ay ipina-contempt ng House committee on good government and public accountability at inutusang maglingkod ng limang araw na pagkakadetine, na kalaunan ay pinalawig sa 10 araw dahil sa kaguluhang naganap.

Opisyal ding humiling si Marbil sa Armed Forces of the Philippines (AFP) chief of staff na si Gen. Romeo S. Brawner na tukuyin ang mga tauhan ng VPSPG na sinasabing tumulong sa sapilitang paglilipat kay Lopez mula VMMC patungong St. Luke’s Medical Center gamit ang isang pribadong ambulansya na nirentahan nila.

“In a video that surfaced, VPSPG head, Colonel Raymund Dante Lachica, was seen physically pushing and assaulting the PNP doctor-in-charge, which could lead to a direct assault complaint,” ayon kay Marbil.

Sinabi rin ni Marbil na kasalukuyang nire-review ng PNP Criminal Investigation and Detection Group, sa pangunguna ni Brigadier Gen. Nicolas D. Torre III, ang mga posibleng kaso batay sa umiiral na mga batas.

Lumabas sa mga ulat na maaaring naapektuhan ng mga aksyon nina VP Duterte at iba pa ang legal na kautusan ng HOR, pati na rin ang operasyon sa parehong detention center at VMMC.

“The rule of law is fundamental to our democratic system. No one, regardless of their position, should be above accountability. The PNP remains committed to ensuring the proper execution of lawful orders and protecting public order,” paliwanag ni Marbil.

Binigyang-diin din niya na ang anumang pagtutol o pagsuway sa legal na awtoridad ay sumisira sa integridad ng demokratikong institusyon at prinsipyo ng pagkakapantay-pantay sa harap ng batas.

“We call upon everyone to respect legal processes and cooperate with authorities. As public servants, it is our duty to uphold the law and set an example. Resistance and disobedience to a person in authority not only violates the law but also undermines public trust,” dagdag pa niya.

Tiniyak din ng PNP chief sa publiko ang patas at masusing imbestigasyon, at sinabi na ang mga ebidensyang makakalap ay magiging batayan ng mga nararapat na kaso.

“We will ensure that due process is followed, and the law is enforced without bias. Let this serve as a reminder that justice must prevail, and no one is above the law,” aniya.

Ayon kay PNP spokesperson Brig. Gen. Jean S. Fajardo, nananatiling bukas ang PNP sa pakikipagtulungan sa mga sangay ng lehislatibo at hudikatura upang matugunan ang isyu at masigurong may pananagutan. Hinikayat din ng PNP ang publiko na manatiling mapagbantay sa pagprotekta ng mga demokratikong prinsipyo at integridad ng pamahalaan, dagdag niya.