Trump binanatan ang Israel at Iran sa paglabag sa ceasefire

Matapos lamang ang ilang oras mula nang ianunsyo ni dating U.S. President Donald Trump ang isang ceasefire sa pagitan ng Israel at Iran, agad nitong binatikos ang magkabilang panig dahil umano sa paglabag sa kasunduan — partikular na ang Israel na agad naglunsad ng bagong opensiba laban sa Tehran.

“Israel. Huwag kayong maghulog ng bomba. Kapag ginawa ninyo ‘yan, malalang paglabag ‘yan. Pauwiin ang mga piloto ngayon na!” ani Trump sa kanyang post sa Truth Social habang papunta sa NATO Summit sa The Hague.

Sa isang panayam bago siya sumakay ng helicopter mula sa White House, sinabi ni Trump na labis siyang nadismaya sa parehong panig, ngunit mas galit umano siya sa Israel.

“Kailangan kong pakalmahin ang Israel ngayon. Pagkatapos ng kasunduan, agad silang nagbagsak ng napakalaking bilang ng bomba—pinakamalaki raw na nakita,” ani Trump.

Bago pa man ang komentaryo ni Trump, inihayag ni Israeli Defense Minister Israel Katz na iniutos niya ang bagong airstrikes sa Tehran bilang ganti sa umano’y pagpapakawala ng mga missile ng Iran — bagay na mariing itinanggi naman ng Iran. Ayon sa Tehran, nagpapatuloy pa rin ang pambobomba ng Israel kahit lumagpas na sa oras ng ceasefire.

Mabibigat rin ang binitiwang salita ni Trump laban sa dalawang bansa:

“Iran at Israel, sobrang tagal at tindi ng laban nila, hindi na nila alam ang ginagawa nila,” wika ni Trump bago umalis.

Sa kabila ng tensyon at kaguluhan, dama sa buong rehiyon at sa ibang panig ng mundo ang pag-asa na maaari nang matapos ang digmaan, 12 araw mula nang biglang umatake ang Israel, at dalawang araw mula nang sumali si Trump sa opensibang militar kontra Iranian nuclear sites.

“Masaya kami. Hindi mahalaga kung sino ang nag-ayos o paano ito nangyari. Ang mahalaga: tapos na ang giyera. Hindi man lang dapat ito nagsimula,” pahayag ni Reza Sharifi, 38, isang Iranian na bumalik na sa Tehran mula Rasht kung saan sila pansamantalang lumikas.

Sa Tel Aviv, sinabi ng software engineer na si Arik Daimant na bagaman nasira na ang kanilang bahay noong nakaraang linggo, umaasa pa rin siya na ito ang simula ng kapayapaan.

“Medyo huli na para sa pamilya ko — wasak ang bahay namin — pero sabi nga nila: ‘mas mabuti nang huli kaysa hindi.’ Sana ito na ang bagong simula.”

nanunsyo ni Trump ang ceasefire sa isang maikling post:

“THE CEASEFIRE IS NOW IN EFFECT. PLEASE DO NOT VIOLATE IT!”

Gayunpaman, nananatili ang pangamba na maaaring masira muli ang tigil-putukan kung magpapatuloy ang agresyon ng alinmang panig.