Thunderz vs Dumaguete, IPPC vs Samurai… ‘BASEBALL MANIA SA MANILA’ LBP TINGZON CUP NOW NA!

ISANG maaliwalas na umaga at magandang panahon ang tatamasahin ngayong maghapon na magbibigay-daan sa pagbubukas ng isang  makasaysayang sports event na tatatak sa talaan ng bayang beysbolista.

Hahataw na rin sa wakas ang ‘baseball mania’ sa Manila sa pagratsada ng doubleheader ng Liga Baseball Philippines( LBP) Tingzon Cup ngayong araw ng Sabado sa historic Rizal Memorial Baseball Stadium.

Ayon kay LBP Chairman Anando ‘Wopsy Zamora, tatampukan ang remarkable event sa larangan ng sports  ang grandeng pambungad seremonya ng kauna-unahang commercial baseball league sa bansa na bobonggahan ng parada ng mga koponan sa diamond na kinabibilangan ng kakokoronang UAAP champion na  National University, University of Santo Tomas,Ateneo de Manila University, Thunderz, Dumaguete, Katayama Baseball Academy, Itakura Parts Philippines Corporation at Samurai.

” All teams are champion caliber. May the best team win and bring home the title of the historic league LBP. Bakbakan na!” pahayag ni Zamora.

Tiniyak naman ni LBP president Jose Antonio Munoz (siya ring PABA secgen) na dadalo sa opening ceremony si PABA president Chito Loyzaga bilang espesyal na panauhin pati  na si Philippine Sports Commission Chairman Richard Bachmann.

Sinabi naman ni Executive Director Rodolfo Boy Tingzon, Jr. na doubleheader ang handog ngayon ng LBP Tingzon Cup na buenamanong  hahataw ang malalakas na koponang    Thunderz kontra Dumaguete sa ganap na 8am habang magtutunggali ang powerhouse teams IPPC( Itakura Parts Philippines Corp.) Hawks  laban sa  Samurai bandang alauna ng hapon.

Bukod kina Zamora, Munoz at Tingzon, ang iba pang opisyal na bahagi  pagkatatag ng LBP ay sina Directors Loyzaga, Rene Andrei Saguisag,Jude Torcuato,Felipe Remollo,Jose Emmanuel Eala, Josedinno Mariano, Raymond Tolentino , Michael Zialcita at Anthony Suntay.Executive Administrator si Mariano Artoyo at corporate secretary si Julie Ann Yabes. (DANNY SIMON)