SMALL RECLAMATION NG CHINA SA WPS, NAPIGILAN NG PCG

Tiwala ang Philippine Coast Guard na napigil nang pinaigting na pagbabantay ng PCG ang  ginagawang small scale reclamation ng China sa Sandy Cay at Sabina shoal na bahagi ng West Philippine Sea.

Sa press briefing, sinabi ni Commodore Jay Tarriela, tagapagsalita ng PCG sa isyu ng West Philippine  Sea, na pinuntahan ng kanilang divers ang seabed o ilalim ng karagatang nakapaligid sa Sabina shoal.

May mga nakita aniya silang mataas na ang seabed ngunit sa kanilang pagsukat, hindi na ito nadagdagan.

Maging sa Sandy Cay hindi na rin aniya nadagdagan ang sukat ng mga nakita nilang tambak.

Dahil dito, kumbinsido si Tarriela na nahadlangan nila ang reclamation ng China sa Sabina Shoal.

Aminado ang opisyal na palaisipan sa kanila kung paano nagagawa ng China ang pagtatambak ng mga durog na dead corals, ngunit  kapansin pansin aniya na tuwing nagkakaroon  ng pulutong ng chinese vessels ay may mga nakikitang tambak ng patay na corals.

Ayon kay Tarriela sa 29 na araw ng pananatili ng kanilang barko sa Sabina Shoal, 44 na chinese vessels ang kanilang namonitor.