Sinampahan ng Securities and Exchange Commission (SEC) ng mabibigat na aksyon ang dalawang lending company na nahuling nagpapatakbo ng ilegal na operasyon.
Sa July 31 order ng Financing and Lending Companies Department (FinLend) ng SEC, ipinag-utos ang cease-and-desist order laban sa Fuse Lending Inc. matapos madiskubreng ginagamit nito ang lumang corporate name ng Fuse Financing Inc. para mag-operate bilang lending business kahit walang lisensya.
Ayon sa SEC, hindi rehistrado ang Fuse Lending bilang korporasyon, partnership, o one-person corporation, at wala rin itong certificate of authority para magpatakbo ng lending company—na malinaw na paglabag sa Lending Company Regulation Act.
Ang reklamo laban sa Fuse Lending ay isinampa mismo ng Fuse Financing, lending arm ng GCash, matapos mabulgar na may website na ginagamit ang kanilang dating pangalan na posibleng manloko ng publiko at makasira sa lehitimong operasyon ng kumpanya.
Bukod sa pagpapatigil, ipinagbawal din sa mga may-ari, operator, at kahit sinong kumikilos para sa Fuse Lending ang anumang pagpapromote o pagsasagawa ng lending transactions.
Samantala, sa August 1 order, sinuspinde ng SEC ang certificate of authority ng Sumulong Financing Inc. sa loob ng 60 araw dahil sa iligal na paglunsad ng kanilang online lending platform na Fundly nang walang aprubadong amended business plan—na labag sa SEC Memorandum Circular No. 3, Series of 2022.
May iba pa ring violation ang Sumulong Financing, kabilang ang hindi paglalagay ng contact details ng kanilang complaints unit sa opisyal na komunikasyon, na required sa ilalim ng SEC Memorandum Circular No. 5, Series of 2023.
Bukod sa suspensyon, pinagmulta rin sila ng ₱10,000.
“Kailangang itigil ang operasyon para maiwasan ang panlilinlang at panganib sa publiko,” babala ng SEC.
About the Author
