Pormal na inilunsad ni Department of Finance (DOF) Secretary Ralph G. Recto ang ika-31 tranche ng Retail Treasury Bonds (RTB-31) ngayong Martes, na layong tuparin ang pangako ni Pangulong Ferdinand R. Marcos, Jr. na gawing mas accessible ang pag-iimpok at pamumuhunan para sa lahat ng Pilipino.
Sa kanyang mensahe sa isinagawang paglulunsad sa Bureau of the Treasury (BTr), binigyang-diin ni Secretary Recto na ang RTB-31 ay hindi lamang isang ligtas na instrumento sa pamumuhunan kundi bahagi rin ng mas malawak na adbokasiya ng pamahalaan para sa financial inclusion at pambansang kaunlaran.
“Ito ay katuparan ng pangako ng administrasyon ni Pangulong Bongbong Marcos, Jr. na gawing abot-kamay para sa bawat Pilipino ang pagkakataong makaipon at mamuhunan para sa sariling kinabukasan, habang tumutulong sa pag-unlad ng bayan,” ani Recto.
Ang RTB-31 ay isang five-year government bond na may gross interest rate na 6.000% kada taon, na babayaran kada tatlong buwan hanggang sa maturity nito sa Agosto 20, 2030. Ang public offering period ay magtatagal mula Agosto 5 hanggang Agosto 15, 2025.
Sa minimum investment na ₱5,000, bukas ang RTB-31 sa lahat ng Pilipino, sa loob at labas ng bansa. Garantisado ito ng buong financial capacity ng pamahalaan, kaya’t itinuturing na halos walang panganib na investment.
Bilang bahagi ng digital transformation at pagpapalawak ng access sa merkado, ang RTB-31 ay maaring bilhin over-the-counter, sa pamamagitan ng online banking, at gamit ang GBonds sa GCash — kung saan maaaring mag-invest ng halagang ₱500 lamang, kahit walang bank account. Ang inobasyong ito ay naisakatuparan sa pakikipagtulungan ng pamahalaan sa Philippine Digital Asset Exchange (PDAX) at Bonds.ph.
Ayon kay Secretary Recto, layunin ng pamahalaan na ang mga produkto sa capital market ay hindi na lamang mapakinabangan ng mayayaman at eksperto sa pananalapi, kundi ng lahat ng Pilipinong nagnanais ng pinansyal na seguridad, kabilang na ang mga estudyante, overseas Filipino workers (OFWs), maliliit na negosyante, at mga manggagawa.
“We are aggressively making our RTBs available and accessible to everyone—gaya ng mga estudyante, OFWs, sari-sari store owners, farmers, at young professionals. Anyone who wants their money to work as hard as they do,” ani Recto.
Binanggit din ng kalihim na ang bawat pisong inilalagak sa RTBs ay may dalawang balik: tubo para sa mamumuhunan at pondo para sa mga proyektong makikinabang ang buong sambayanan, gaya ng imprastraktura, edukasyon, at serbisyong panlipunan.
“Ito lang ang investment na doble doble ang balik sa’yo. Dahil bawat RTB na nabibili ay bumabalik hindi lamang bilang interest, kundi bilang mga imprastraktura, estudyanteng libreng nakakapag-aral, at bawat pamilyang naiaahon natin sa kahirapan,” pahayag ni Recto.
Tiniyak ng DOF na mananatiling maingat, bukas, at responsable ang pamahalaan sa pamamahala ng pondong nakokolekta mula sa mga RTB. “We treat it as a sacred bond between the government and Filipino citizens. Between your hard-earned money and our promise to use it wisely, transparently, and purposefully with the future of the next generation in mind,” ani Recto.
Kasabay ng paglulunsad ng RTB-31 ang pagpapatupad ng Capital Market Efficiency Promotion Act (CMEPA) na layong pababain ang gastos sa pamumuhunan at gawing mas epektibo at inklusibo ang paglahok ng mamamayan sa capital market.
Dumalo rin sa opisyal na paglulunsad sina DOF Undersecretary Domini Velasquez, National Treasurer Sharon Almanza, GCash Mynt CEO Martha Sazon, PDAX CEO Nichel Gaba, LANDBANK PCEO Lynette Ortiz, at DBP PCEO Michael De Jesus.
About the Author
