QC bukas na muli sa mga bagong iskolar para sa SY 2025–2026

QUEZON CITY — Inanunsyo ng pamahalaang lungsod ng Quezon City ngayong Linggo na muli itong tumatanggap ng aplikasyon para sa Quezon City Scholarship Program (QCSP) para sa darating na School Year 2025–2026.

Mula Hunyo 2 hanggang Hunyo 13, maaaring magsumite ng kanilang aplikasyon ang mga senior high school, kolehiyo, at vocational education students sa pamamagitan ng QC eServices website.

Upang maging kwalipikado, kinakailangang lehitimong residente ng Quezon City ang aplikante, may valid QCitizen ID, at hindi tumatanggap ng anumang iba pang scholarship mula sa ibang LGU.

Ngayong taon din inilunsad ang bagong kategoryang QC Excel Scholarship, na layuning hubugin ang susunod na henerasyon ng mga lider sa lungsod. Bukas ito sa mga incoming first-year college students na kukuha ng priority courses, may kahusayan sa akademiko, karanasan sa pamumuno, at malasakit sa paglilingkod-bayan.

“Ang pamumuhunan sa ating kabataan ay pamumuhunan sa kinabukasan ng lungsod,” ani Mayor Joy Belmonte.

“Ang patuloy na paglaki ng bilang ng ating mga iskolar ay patunay ng ating layunin na wakasan ang agwat sa edukasyon.”

Simula noong 2019, umabot na sa 39,566 QCitizens ang nakinabang sa QCSP. Para sa SY 2024–2025 lamang, 17,422 iskolar ang suportado dahil sa pagpasa ng Ordinansa Blg. SP-3283, S-2024 sa pamumuno ni Vice Mayor Gian Sotto. Sa ilalim ng ordinansa, pinalawak ang mga kategorya ng scholarship at tinaasan ang pinansyal na tulong para sa mga benepisyaryo.

Sa kabuuan, 14,898 na iskolar ng QCSP ang matagumpay nang nakapagtapos, karamihan sa kanila ay nagtatrabaho na ngayon sa larangan ng negosyo, IT, engineering, at edukasyon. Bukod sa tuition support at semestral stipends, binibigyan din ng mentorship ang mga iskolar at hinihikayat na sumali sa mga leadership at community engagement programs ng lungsod.