Isiniwalat ng Commission on Audit (COA) supervising auditor na si Xylene Mae Del Campo sa pagpapatuloy ng Senate impeachment trial ngayong Martes, Agosto 11, 2026, na mayroong mahigit 23 kahina-hinalang pangalan ang lumabas sa mga acknowledgment receipts na isinumite ng Office of the Vice President (OVP) para sa paggamit ng confidential funds noong 2023.
Kabilang sa mga ipinakitang risibo ang mga pangalang tulad nina “Pia Piattos-Lim,” “Ralph Josh Bacon,” “Jay Kamote,” “Miggy Mango,” pati na rin ang mga pangalang kapareho ng ilang sikat na pampublikong pigura.
Sa kaniyang testimonya habang sinusuri ng prosecution panel, ipinaliwanag ni Del Campo na umabot sa 1,049 acknowledgment receipts ang kaniyang tinabulasyon para sa unang dalawang kuwarter ng 2023.
Gayunpaman, binigyang-diin ng auditor na compliance audit lamang ang isinagawa ng COA Intelligence and Confidential Funds Audit Office (ICFAO) kung saan tiningnan lamang kung kumpleto at ayos ang mga liquidation documents, nang hindi beripikado kung umiiral ba talaga ang mga natatanging indibidwal na nakapangalan sa mga risibo.
Bukod dito, pinalagan din ng estado ang isinumiteng certifications at Protective Intelligence Operations Reports para sa milyun-milyong pisong reward payments.
Pinaliwanag ni Del Campo na ang mga ulat ay naglalaman lamang ng mga pangkalahatang pahayag ukol sa mga aktibidad at ang kawalan ng “untoward incidents,” subalit hindi ito nagpakita ng mga tiyak at matagumpay na accomplishment sa intelligence monitoring o surveillance upang magkaroon ng sapat na basehan ang paglalabas ng pondo.
About the Author
