P680,000 SHABU NASABAT SA 2 DRUG SUSPECT SA PASIG CITY

ARESTADO ang dalawang drug personalities matapos makuhanan ng methamphetamine hydrochloride o shabu sa Pasig City, kagabi.

Kinilala ang mga suspek na sina Romeo Orderio, 25, ng Barangay Pinagbuhatan at isang menor de edad ng Evangelista Compound sa nasabing siyudad.

Dakong alas-7:00 ng gabi nang madakip ang dalawa sa ikinasang buy-bust operation ng pinagsanib na puwersa ng PDEA Cavite Provincial Office at PDEA Bangsamoro Autonomous Region in Muslim Mindanao (BARMM).

Nakuha mula sa dalawa ang mahigit kumulang 100 gramo ng hinihinalang shabu na nagkakahalaga ng P680,000 at buy-bust money.

Kasong paglabag sa Section 5 (Sale of Dangerous Drugs), Article II ng RA 9165 ang isinampa laban sa mga suspek.