P170-B KONTRATA SA REHABILITASYON NG NAIA NASUNGKIT NG SAN MIGUEL

Opisyal nang inanunsiyo ng Department of Transportation (DOTr), na ang SMC SAP and Co Consortium ang nanalong bidder para sa P170 bilyong kontrata para sa rehabilitasyon, pagpapatakbo at pananatili ng Ninoy Aquino International Airport (NAIA).

Nagpapasalamat naman ang San Miguel Corporation sa DOTr, sa pamumuno ni Secretary Jaime Bautista para sa pagsasagawa ng patas at komprehensibong bidding process. Pinuri rin nito ang administrasyon ni Pangulong Marcos Jr para sa commitment nito na gawing moderno ang NAIA.

“Our proposal is designed not only to elevate NAIA to world-class standards but also to ensure that the government benefits from the most advantageous revenue-sharing agreement. This aims to secure a favorable outcome for our shareholders while prioritizing fairness and long-term sustainability over immediate profits,” ayon sa SMC.

“Recognizing the weight of the responsibility entrusted to us, we are committed to collaborating closely with the government and our various stakeholders, harnessing every resource available to us, to transform NAIA into a modern international gateway that Filipinos will be proud of,” dagdag pa nito.

Ang SMC SAP & Company Consortium, na binubuo ng San Miguel Holdings Corp., RLW Aviation Deve­lopment Inc. at RMM Asian Logistics Inc., at Incheon International Airport Corp., ay nag-alok ng pinakamataas na bid na 82.16 percent revenue share sa gobyerno.

Ang nanalong bidder ay magbabayad din ng P30 bilyong upfront cost at taunang annuity payment na P2 bilyon sa gobyerno.

Ang dalawa pang bidder na nagsumite ng financial bid ay ang Manila International Airport Consortium (25.91 percent) at GMR Airports International BV (33.3 percent).

Ang nagwaging bidder ay magkakaroon ng hanggang Marso 6 upang magsumite ng mga kinakailangan sa post-award.

Inaasahan ng DOTr na pipirmahan ang concession agreement sa nanalong bidder sa Marso 15, kung saan ang pasilidad ay malamang mai-turnover sa Setyembre ng taong ito.

Ang proyekto ng NAIA ay nagsasangkot ng pamumuhunan sa kapital upang mapabuti ang mga pasilidad ng paliparan at makasunod sa International Civil Aviation Organization (ICAO) at iba pang internasyonal na pamantayan.

Ang concessionaire ay magiging responsable para sa parehong landside at airside na mga operasyon ng NAIA, pagpapahusay sa pagsunod, kaligtasan, seguridad, at kapasidad upang matugunan ang pagtaas ng trapiko sa himpapawid.

Tiniyak naman na walang matatanggal sa airport sa nasabing privatization.