P1-M SHABU NASABAT SA 4 ‘DURUGISTA’ SA MAYNILA

ARESTADO ang apat na suspek sa ikinasang buy-bust operation sa kanto ng Jose Abad Santos Abe., at Hermosa St., Tondo, Manila.

Kinilala ang mga naaresto na sina Sahawi Bassit alyas ‘Imam,’ 46-anyos; Taras Malambut, 18; Jerry Maulana, 36, security guard; at Rahma Maulana, 34.

Bago isinagawa ang buy-bust operation ay isinailalim muna sa mahigit kalahating buwang surveillance ang aktibidades ng ilegal na droga ng mga suspek at nang magpositibo ay agad ikinasa ang operasyon pasado alas-8:15 kagabi.

Nasamsam mula sa mga suspek ang tinatayang 15 piraso ng maliliit na plastic sachet na naglalaman ng 150 na gramo ng bawal na droga o hinihinalang shabu na nagkakahalaga ng P1,054,000 at buy-bust money.

Kaugnay nito, pinapurihan ni NCRPO Regional Director PMGen. Debold Sinas ang MPD Station 7 dahil sa maagap na pagkakabuwag sa illegal drugs trade ng mga suspek na baguhan pa lamang aniya sa operasyon ng ipinagbabawal na gamot.