Nakitaan ng mataas na antas ng Iodine-129, isang radioactive isotope na nagsisilbing indicator ng nuclear activity, ang tubig sa West Philippine Sea (WPS).
Ito ang kinumpirma ng University of the Philippines Marine Science Institute (UP-MSI) matapos ang isinagawang pagsusuri sa 119 seawater samples mula sa iba’t ibang bahagi ng kapuluan gaya ng Philippine Rise at Sulu Sea.
Ayon sa pag-aaral, ang konsentrasyon ng Iodine-129 sa WPS ay mas mataas ng 1.5 hanggang 1.7 beses kumpara sa ibang sampling sites sa bansa.
Binigyang-diin ng UP-MSI na ang naturang kemikal ay hindi nagmula sa Pilipinas dahil wala namang aktibong nuclear power plant ang bansa, at wala rin itong kapasidad na bumili ng mga nuclear weapon.
Pinapaniwalaan ng mga eksperto na ang mga bakas ng nuclear indicator ay inanod patungo sa karagatan ng Pilipinas mula sa Yellow Sea malapit sa Korea at Bohai Gulf sa hilagang bahagi ng China.
Batay sa kasaysayan, ang mga lugar na ito ay naging testing grounds ng mga lumang nuclear weapons mula sa Europa at kinalalagyan din ng mga pasilidad para sa nuclear fuel reprocessing.
Ang Iodine-129 ay may half-life na 15.7 milyong taon, kaya naman itinuturing itong “radioactive fingerprint” na ginagamit ng mga siyentipiko upang matukoy ang direksyon ng agos ng karagatan at lawak ng nuclear contamination sa mundo.
Bagaman radioactive ang Iodine-129, tiniyak ng mga eksperto mula sa Department of Science and Technology-Philippine Nuclear Research Institute (DOST-PNRI), UP-MSI, at University of Tokyo na ang kasalukuyang antas nito sa WPS ay hindi nagdudulot ng banta sa kalusugan ng tao, sa pangisdaan, o sa kapaligiran.
Gayunpaman, nagsisilbi itong babala upang paigtingin ang monitoring at regulasyon sa mga radioactive materials na tumatawid sa mga hangganan ng bansa.
Dahil sa tagal bago ito mawala, maaari itong maging sanhi ng pangmatagalang panganib sa kalusugan kung maipon sa thyroid gland sa pamamagitan ng kontaminadong tubig.
Bukod sa pagiging indicator ng polusyon, ang Iodine-129 ay mahalaga sa siyentipikong pananaliksik upang malaman ang edad ng mga sinaunang groundwater.
Ginagamit din itong batayan sa pagpili ng mga ligtas na lugar para sa pagtatapon ng radioactive waste upang matiyak na hindi ito kakalat sa loob ng milyun-milyong taon.
Ang pag-aaral na ito, na pinamagatang West Philippine Sea 2026 Trace Detection, ay pinondohan ng DOST-National Research Council of the Philippines at ng DOST-PCAARRD bilang bahagi ng pagsisikap na bantayan ang kalagayan ng karagatang sakop ng Pilipinas. (LIMUEL TOLENTINO)
About the Author
