LULONG SA SCATTER NAGNAKAW NG P10K BARYA SA PISONET

ARESTADO ang isang 21-anyos na lalaki sa Barangay Lahug, Cebu  City dahil sa pagnanakaw ng P10,000 halaga ng barya mula sa isang “piso net” internet café.

Kinilala ang suspek na si Gabriel, na nadakip pasado alas-5:00 ng gabi. Habang nangyari ang pagnanakaw ng alas-4:00 am ng araw ding iyon.

Ayon sa pulisya, inamin ni Gabriel ang krimen pero ibinunyag na wala na sa kanya ang pera. Pinagpartehan na umano nila ito ng kanyang mga kaibigan para ipangtaya sa isang online casino game na “Scatter.”

Nagsisi na rin ang suspek sa kanyang nagawa na naglagay sa kanya sa ganoong sitwasyon.

Nahaharap ngayon si Gabriel sa kasong theft at hinimok ng mga awtoridad ang mga internet café operator na paigtingin ang kanilang seguridad upang hindi na muling maulit ang ganitong mga pangyayari.