LACUNA, NAGPASALAMAT SA MGA MANILEÑO SA PAGKAKATAONG MAGING UNANG BABAE NA ALKALDE NG MAYNILA

Maynila — Buong kababaang-loob na tinanggap ni Manila Mayor Honey Lacuna ang pasya ng nakararami matapos ang halalan, at taos-pusong nagpasalamat sa mga Manileño sa pagkakaloob sa kanya ng karangalang maging kauna-unahang babaeng alkalde sa kasaysayan ng lungsod.

“Nais kong ipahayag ang taos puso kong pasasalamat sa lahat ng mga nagtiwala, tumulong, sumama, nakiisa at nakibahagi sa ating paninindigan,” ani Lacuna sa isang pahayag matapos ang halalan.

Pinuri ni Lacuna ang mga tumulong at sumuporta sa kanyang kampanya, at sa mga naglaan ng oras, talino, at lakas para sa tagumpay ng kanyang grupo. Aniya, ang pagkakapanalo niya ay hindi lamang tagumpay ng isang kandidato kundi ng mga taong nagnanais ng tapat na serbisyo sa pamahalaan.

Ayon sa alkalde, tapos na ang eleksyon at isa na namang mahalagang yugto ng demokrasya ang nasaksihan ng sambayanan. “Ang araw ng halalan ay tanging sandali kung kailan pantay-pantay ang kapangyarihan ng bawat isa — mahirap man o mayaman,” aniya.

“Buong pagpapakumbaba kong ipinagkakapuri ang malaking karangalan na ipinagkaloob ninyo sa akin. Mula noon at magpahanggang ngayon, taas noo nating inaalay ang tapat at totoong serbisyo sa mamamayang Manileño,” dagdag pa ng alkalde.

Bilang doktor at ina ng lungsod, nangako si Lacuna na ipagpapatuloy niya ang kanyang malasakit at dedikasyon sa mga Manileño.

“Muli, ang taos-puso kong pasasalamat sa inyong lahat. Sa Diyos natin ibigay ang kapurihan at karangalan dahil sa Kanya nagmumula ang pinaka-magandang plano para sa bawat isa,” wika niya.

Inalala rin niya ang pamana ng kanyang amang si Danny Lacuna, na minsang nanilbihan din sa pamahalaang lungsod.

“Ang pagmamahal ninyo at pagtitiwala sa Pamilyang Lacuna… ay hinding-hindi ko malilimutan. Mahal na mahal ko kayong lahat, mga kapwa ko Manileño. Pagpalain tayong lahat ng Poong Maykapal,” pagtatapos ni Mayor Lacuna. (ARSENIO TAN)