Ex-PSG Chief Jesus Durante, inabsuwelto sa Chua-Plaza murder case

Inabsuwelto ng military court si dating Presidential Security Group (PSG) chief Brigadier General Jesus Durante III sa kasong pagpatay sa negosyanteng si Yvonette Chua Plaza noong Disyembre 29, 2022.

Sa desisyong inilabas nitong Miyerkules, Mayo 28, idineklara ng korte militar na walang sala si Durante, na matagal nang iniuugnay sa brutal na pamamaslang sa tapat ng bahay ni Chua-Plaza sa Green Meadows Subdivision, lungsod ng Davao.

Ayon kay Atty. Ramon Edison Batacan, legal counsel ni Durante, maluwag ang loob ng heneral sa naging desisyon. “Malalim ang kanyang pasasalamat at ginhawa sa pagkakatibay ng kanyang pagiging inosente. Ito ang katapusan ng isang mapait at mahaba-habang kabanata sa kanyang buhay,” ani Batacan sa panayam ng Newsline Philippines.

Bagama’t masaya sa resulta, inamin ni Batacan na hindi matatawaran ang epekto ng halos dalawang taong pagkakakulong at legal na laban ni Durante. “Nadismaya siya hindi lang bilang opisyal kundi bilang ama at lingkod-bayan. Nawalan siya ng mahahalagang sandali kasama ang pamilya at hindi niya nagampanan ang kanyang tungkulin sa serbisyo militar,” dagdag ni Batacan.

Sa kabila nito, iginiit ng abogado na nanatili ang tiwala ni Durante sa sistema ng hustisya. “Alam niyang hindi perpekto ang sistema, pero sa huli, nanaig ang due process at katarungan,” ani Batacan.

Ngayong malaya na, inaasahang magbabalik sa serbisyo si Durante na may panibagong sigasig. “Mas titibay pa ang kanyang paninindigan para sa integridad, katarungan, at tiwala ng publiko,” wika pa ng abogado. “Hindi na siya lilingon sa nakaraan. Ang hangad niya ngayon ay makabawi, makapagsilbi, at makapag-ambag sa komunidad.”

Ang pagkakaabsuwelto ni Durante ay malaking usapin sa kaso ng pagpaslang kay Chua-Plaza, na naging laman ng mga balita noong 2022. Si Durante, na noo’y brigade commander sa Davao de Oro at dating PSG chief sa ilalim ng administrasyong Duterte, ay unang inakusahan bilang utak sa pagpatay. Ilang tauhan niya rin ang sinampahan ng kaso.

Patuloy pa rin ang pag-usad ng kaso para sa mga iba pang akusado.