MAYNILA — Ipinahayag ng Department of Tourism (DOT) nitong Linggo, Mayo 18, ang kanilang layunin na maisakatuparan ang ASEAN visa, isang inisyatibang layong gawing mas madali ang paglalakbay sa mga bansa sa Southeast Asia upang lalong paigtingin ang turismo sa rehiyon.
Sa ilalim ng ASEAN Framework Agreement on Visa Exemption, papayagan ang mga mamamayan ng Brunei, Cambodia, Indonesia, Laos, Malaysia, Myanmar, Pilipinas, Singapore, Thailand, at Vietnam na makatawid sa mga border ng walang visa sa loob ng hanggang 14 na araw para sa pansamantalang pagbisita. Hihingi pa rin ng kaukulang visa para sa mas mahabang pananatili o iba pang layunin ng paglalakbay.
Ayon kay Tourism Secretary Christina Garcia Frasco, kahalintulad ng konsepto ng Schengen visa sa Europa at ng GCC visa sa Gitnang Silangan ang ASEAN visa, na layong gawing isang pinag-isang destinasyon ang buong rehiyon.
Sa kanyang talumpati noong Mayo 15 sa SKIFT Asia Forum 2025, binigyang-diin ni Frasco ang potensyal ng ASEAN na itaguyod bilang isang kabuuang destinasyong may mayamang likas na yaman, kultura, at mabuting pakikitungo ng mamamayan.
“Ang layunin natin ay ang pagkakaisa ng ASEAN bilang destinasyon — hindi upang burahin ang pagkakaiba-iba ng kultura, kundi upang bigyang-halaga ang yaman ng bawat bansa,” ayon kay Frasco.
Ibinahagi rin ng kalihim na positibo ang naging tugon ng ibang ASEAN member-countries, at inaasahang tatalakayin pa ito sa mas malalim na antas sa nalalapit na ASEAN convention sa Pilipinas sa 2026.
Bilang patunay ng kooperasyon, binanggit ni Frasco ang limang taong kasunduan ng Pilipinas at Thailand (2025–2030) para sa pagpapalago ng turismo sa pamamagitan ng palitan ng kaalaman, pananaliksik, at mga mapagkukunan.
Kasabay nito, ipinahayag ng DOT na bumabawi na ang bansa sa pagbaba ng mga turistang Chinese, at kasalukuyang nakikita ang pagtaas ng bilang ng mga dayuhang bisita mula sa Gitnang Silangan at GCC. Ayon kay Frasco, umaabot sa 500% hanggang 800% ang paglago ng turismo mula sa mga bansang ito, bunga ng pinalawak na promosyon ng Pilipinas sa iba’t ibang panig ng mundo.
Patuloy ang panawagan ng DOT para sa pagkakaisa ng mga bansa sa ASEAN upang gawing mas madali, mas ligtas, at mas kapaki-pakinabang ang turismo sa rehiyon.
About the Author
