Cardinal Robert Francis Prevost ang bagong Santo Papa

VATICAN CITY — Sa kauna-unahang pagkakataon sa kasaysayan, isang Amerikanong pari ang nahalal bilang Santo Papa. Si Cardinal Robert Francis Prevost, isang misyonerong may malalim na karanasan sa Peru at beterano sa loob ng Vatican bureaucracy, ang opisyal na itinanghal na Pope Leo XIV.

Tubong Chicago, si Pope Leo XIV ay kilala sa kanyang pagiging mahinahon, bukas sa dayalogo, at may malalim na pagkaunawa sa mga pangangailangan ng mga nasa laylayan ng lipunan—mga tinatawag ni Pope Francis na “peripheries”. Sa halos sampung taon niyang paglilingkod bilang misyonero sa Peru, nakita ang kanyang matibay na ugnayan sa mga komunidad at kakayahang maging tulay sa pagitan ng iba’t ibang pananaw sa loob ng Simbahan.

Bago ang kanyang pagkakapili bilang papa, si Prevost ay pinamunuan ang makapangyarihang Dicastery for Bishops, ang tanggapan na nangangasiwa sa pagtatalaga ng mga obispo sa buong mundo. Siya rin ay Cardinal Prefect simula 2023 at naging mahalagang tagapayo ni Pope Francis, na nagtalaga sa kanya sa kabila ng mas konserbatibong hilig ng ibang mga cardinal.

Tinawag ng Italianong pahayagang La Repubblica si Prevost na “the least American of the Americans,” patunay sa kanyang malumanay na pamumuno at pandaigdigang pananaw. Bihasa rin siya sa canon law—isang aspeto na nagbibigay kumpiyansa sa mas konserbatibong sektor ng Simbahan.

Sa isang panayam bago ang conclave, sinabi ni Prevost:

“Hindi tayo puwedeng tumigil, hindi tayo puwedeng umatras. Kailangang alamin kung paano hinuhubog ng Espiritu Santo ang Simbahan sa kasalukuyan.”

Isinilang noong Setyembre 14, 1955, sa Chicago, si Prevost ay naging kasapi ng Order of St. Augustine, nagtapos ng matematika sa Villanova University, at kumuha ng doktorado sa canon law sa Roma. Matapos ang dekada niyang misyon sa Peru, bumalik siya sa Chicago bilang provincial prior ng Augustinians bago muling bumalik sa Latin America bilang obispo ng Chiclayo noong 2014.

Ang kanyang pagkakatalaga ay dumating sa gitna ng mataas na pag-asa mula sa mga Vatican observers na naghahanap ng lider na may pastoral na puso at matatag na prinsipyo, kasabay ng hamon ng pagbabago sa loob ng Simbahan.

Bukod sa pagiging Papa, si Leo XIV ay nananatili ring presidente ng Pontifical Commission for Latin America, isang patunay sa kanyang malalim na ugnayan sa rehiyong matagal niyang pinagsilbihan.

Sa bagong kabanatang ito sa kasaysayan ng Simbahan, inaasahang magpapatuloy si Pope Leo XIV sa mga reporma ni Pope Francis—na may mas bukas na paningin, mas malalim na pagkalinga sa maralita, at mas modernong paglapit sa kasalukuyang henerasyon.