Para sa Bell-Kenz Pharma Foundation Inc., ang tunay na tagumpay ng kanilang scholarship program ay hindi lamang nasusukat sa bilang ng mga napagtapos na estudyante, kundi sa mga buhay na patuloy nitong nababago at napauunlad.
Ito ang pinatunayan ng dalawa sa kanilang mga dating BK scholars na sina Shane Jasmin “Shaun” Samson at Thea Macalalad, na nagsisilbing buhay na ebidensya kung paano nagbubunga ang pamumuhunan sa edukasyon ng mga kabataan.
Si Shaun, na lumaki sa isang pamilyang umaasa lamang sa kita ng isang maliit na sari-sari store, ay nakapagtapos ng kursong Political Science bilang Magna Cum Laude sa Polytechnic University of the Philippines (PUP) noong 2024 sa tulong ng Bell-Kenz Foundation.
Malaki ang naitulong ng financial assistance upang maibsan ang kanyang mga gastusin sa pag-aaral, ngunit higit sa lahat, nagbigay ito sa kanya ng kumpiyansa na ituloy ang kanyang pangarap.
Sa kasalukuyan, si Shaun ay bahagi na ng Bell-Kenz Foundation bilang isang CSR Admin Assistant, kung saan siya na mismo ang namamahala sa scholarship program na dating sumuporta sa kanya.
“Dati, naghihintay lang ako ng mensahe na nagsasabing aprubado at may suporta ako. Ngayon, ako na ang tumutulong para ipadala ang mensaheng iyon sa mga bagong scholar,” masayang ibinahagi ni Shaun.
Para naman kay Thea Macalalad, nagsilbing lifeline o salbabida ang scholarship sa pinakamahirap na yugto ng kanyang buhay. Bilang panganay sa mga magkakapatid at anak ng magkahiwalay na magulang, pinagsabay niya ang pag-aaral at ang mabigat na responsibilidad sa pamilya.
Dahil sa tulong ng pundasyon, matagumpay niyang natapos ang kolehiyo, ang kanyang internship, at naipasa ang licensure examination. Kalaunan ay pumasok din siya bilang regular na empleyado sa Bell-Kenz Pharma Inc.
Hindi natapos doon ang suporta ng kumpanya dahil maging nang magkaroon si Thea ng isang medical condition, binuhat siya ng Bell-Kenz upang makakuha ng specialized healthcare. “Hindi lang ako tinulungan ng Bell-Kenz na makapagtapos o magkaroon ng karera—tinulungan nila akong muling mabuo ang aking buhay,” ani Thea.
BASAHIN: PHINMA at Bell-Kenz Foundation, nagsama para sa Maternal Health Care Program sa Cebu
Sa pagmuni-muni sa misyon ng organisasyon, binigyang-diin ni Dr. James Cayetano, Presidente ng Bell-Kenz Foundation, na ang kanilang pangako ay higit pa sa pagbibigay ng perang pantustos sa pag-aaral.
“Ang hangarin ng Bell-Kenz Foundation ay lumikha ng isang siklo ng oportunidad—kung saan ang mga iskolar ngayon ay magiging mga propesyonal, tagapayo, at lider bukas na siyang magbibigay-lakas din sa iba na mangarap nang mas malaki,” pahayag ni Dr. Cayetano.
Dagdag pa niya, pinatunayan nina Shaun at Thea na ang scholarship ay isang pamumuhunan sa potensyal ng tao upang matiyak na walang karapat-dapat na estudyante ang mapipilitang sumuko sa kanilang mga pangarap dahil lamang sa kahirapan.
Para sa mga karagdagang impormasyon ukol sa mga programa ng Bell-Kenz Foundation, maaaring bisitahin ang kanilang opisyal na website sa www.bell-kenz.net.
About the Author
