Ibinunyag ng Philippine Statistics Authority (PSA) nitong Lunes, Pebrero 23, na mahigit 1,600 hinihinalang pekeng birth certificate ang kasalukuyang nakabinbin para sa resolusyon sa gitna ng panawagan ng mga mambabatas na bumuo ng isang espesyal na lupon na direktang magkakansela sa mga pekeng dokumento.
Sa pagdinig ng Senate Committee on Justice and Human Rights, ipinaliwanag ni PSA Director Eliezer Ambatali na sa dami ng mga petisyong naendorso na sa Office of the Solicitor General, ang kaso pa lamang ng napatalsik na alkalde ng Bamban, Tarlac na si Alice Guo ang nagkaroon ng malinaw na pag-unlad.
Bagaman idineklara nang walang bisa ng Tarlac Regional Trial Court ang birth certificate ni Guo noong Setyembre, nananatili pa rin itong nakabinbin sa Court of Appeals habang ang kahalintulad na kaso laban sa kanyang kapatid na si Sheila Guo ay nasa pre-trial stage pa lamang.
Binigyang-diin ni Ambatali na bukod sa napakatagal na proseso sa korte, napakamahal din ng gastos sa bawat kaso dahil umabot sa humigit-kumulang P500,000 ang ginastos ng gobyerno para lamang sa kaso ni Guo o Guo Hua Ping.
Nagbabala ang opisyal na kung itutuloy ang paghahain ng kaso para sa lahat ng 1,600 na petisyon sa pamamagitan ng judicial process, tiyak na mauubos ang badyet ng ahensya.
Ipinahayag naman ni Senator Win Gatchalian ang kanyang pagkadismaya sa bagal ng pagkansela sa dokumento ni Guo sa kabila ng ebidensya na ang mga nakatalang magulang nito ay wala ring record ng kapanganakan o kasal.
Ayon kay Gatchalian, nagtataka ang publiko kung bakit hindi agad makansela ang birth certificate ng isang taong malinaw na hindi naman Pilipino base sa mga imbestigasyon.
Dahil dito, isinusulong ni Gatchalian ang paglikha ng isang special inter-agency committee na magkakaroon ng kapangyarihang magkansela ng mga birth certificate na nakuha sa pamamagitan ng pandaraya nang hindi na kailangang dumaan pa sa mga lokal na korte.
Sinabi ni Ambatali na sinusuportahan ng PSA ang mungkahing ito lalo na’t sa kaso ni Guo Hua Ping ay hindi man lang nila matukoy kung talagang umiiral ang ina nito matapos magtanong-tanong sa kanilang barangay.
Nagbabala rin si Gatchalian na hangga’t hawak ng mga dayuhan ang mga pekeng dokumentong ito, maaari silang makatakbo sa anumang posisyon sa gobyerno gaya ng ginawa ni Guo.
Bilang tugon, iniutos ni Committee Chairman Sen. Kiko Pangilinan ang pagsusumite ng detalyadong impormasyon tungkol sa 1,600 na nakabinbing petisyon upang masusing mapag-aralan ang lawak ng problemang ito.
About the Author
