Para sa Meralco Bolts, ang edad ay numero lamang kung ang kapalit naman ay isang henyo sa loob ng court.
Sa kabila ng pagiging 33-anyos na nang pumasok sa PBA Draft, hindi nag-atubili ang Meralco na piliin ang Fil-Am guard na si Jason Brickman bilang 7th overall pick sa Season 50. Ayon kay Head Coach Luigi Trillo, ang track record at karanasan ni Brickman bilang isang pro ang dahilan kung bakit hindi nila pinalampas ang pagkakataong makuha ito.
“Bumagsak si Jason sa amin sa ikapitong pick. Bagama’t kami ang may pinakamatandang team sa PBA noong draft, pinili pa rin namin siya sa kabila ng kanyang edad,” ani Trillo. “Kailangan naming kunin ang panganib na iyon dahil sa kanyang body of work bilang isang propesyonal.”
Inihalintulad ni Trillo ang sitwasyon ni Brickman kay Caelan Tiongson ng Rain or Shine, na kinuha rin bilang 7th pick sa edad na 32 noong nakaraang season at naging malaking bahagi ng tagumpay ng Elasto Painters.
Hindi matatawaran ang credentials ni Brickman. Bago tumapak sa PBA, naging tanyag siya sa US NCAA Division 1 bilang pang-apat na player sa kasaysayan na nakapagtala ng mahigit 1,000 assists. Siya rin ang pangalawang player sa kasaysayan ng liga na nag-average ng double figures sa puntos at assists sa iisang season, kasunod ng dating NBA player na si Avery Johnson.
Malawak din ang kanyang karanasan sa ibang bansa, matapos maglaro sa Russia, Germany, Thailand, at Taipei, pati na ang paghatid sa Abra North Weavers sa kanilang kauna-unahang kampeonato sa MPBL.
Inaasahang magpapakitang-gilas agad si Brickman sa kanyang debut para sa Meralco sa EASL Home and Away Season 3. Haharapin ng Bolts ang Ryukyu Golden Kings sa isang must-win game ngayong Miyerkules sa Smart Araneta Coliseum upang mapanatili ang tsansa sa playoffs.
“Marami siyang kayang itulong. Sana ay maka-adjust siya agad sa istilo ng laro sa PBA at EASL. Ang kanyang decision-making sa loob ng court ay mag-aangat sa antas ng laro ng aming team,” dagdag ni Trillo.
About the Author
