Bagama’t positibo ang naging feedback sa unang hosting ng bansa para sa WTA 125 Philippine Women’s Open, nilinaw ng Philippine Tennis Association (PHILTA) na hindi magiging madali ang pag-akyat sa mas mataas na level gaya ng WTA 250.
Ayon kay PHILTA Secretary General John Rey Tiangco, ang pagdadala ng WTA 250 sa Pilipinas ay nangangailangan ng mas komplikadong negosasyon. Paliwanag niya, ang prangkisa para sa 250, 500, at 1000 level tournaments ay hindi na direktang hawak ng WTA kundi pagmamay-ari na ng mga pribadong entidad.
“Ang 125, actually the franchise, you get directly from WTA. But the 250s, WTA doesn’t offer anymore… It’s either you lease the franchise or buy it,” ani Tiangco.
Binigyang-diin din niya na limitado lamang ang bilang ng mga slots para sa WTA 250 sa buong mundo, kaya hindi ito isang “sure thing” kahit pa gustuhin ng bansa. Sa kasalukuyan, may tatlong taong kontrata ang Pilipinas para sa WTA 125, na itinuturing na “lucky catch” dahil nasa 60 pa lamang ang ganitong event sa target na 90 sa buong mundo.
Sa kabila ng mga hamon, nagpahayag ng interes si Philippine Sports Commission (PSC) Chairman Patrick Gregorio na makapag-host ng WTA 250 sa hinaharap. Nakatanggap din ng papuri ang bansa mula kay WTA supervisor Cristina Romero dahil sa maayos na pagpapatakbo ng unang 125 tournament sa Pilipinas.
Bagama’t mas mababa ang ranking points at prize money kumpara sa 250, may istratehikong bentahe ang Philippine Women’s Open. Dahil nagaganap ito kasabay ng Australian Open, nagiging “fallback” ito ng mga de-kalibreng player na maagang natatanggal sa Grand Slam.
Halimbawa nito ang Pinay tennis star na si Alex Eala, na agad kumpirmadong lumahok sa Manila matapos ang kanyang naging kampanya sa Australia.
Sa ngayon, mananatili muna ang bansa sa WTA 125 habang pinag-aaralan ang posibilidad ng pag-akyat sa mas mataas na antas ng world tennis. (Ron Tolentino)
About the Author
