ASG member patay sa shootout sa Zamboanga City

ZAMBOANGA CITY — Patay ang isang miyembro ng Abu Sayyaf Group matapos ang engkwentro sa mga pulis sa Barangay Sangali noong Martes, Hunyo 17.

Kinilala ang napatay na suspek na si Naser Haranain, alias Gapur o Gapul, 29 taong gulang, residente rin ng Barangay Sangali.

Ayon sa imbestigasyon, nilalapitan ng mga awtoridad si Haranain upang ipatupad ang warrant of arrest laban sa kanya dahil sa ilegal na pag-aari ng baril at bala. Ngunit nang tangkaing hulihin, tumakas ang suspek.

Habang tumatakbo papunta sa kanyang pump boat, sinalubong siya ng mga Marines na naka-deploy bilang blocking force.

Nagpaputok si Haranain sa mga Marines kaya agad itong rumesponde at nabaril siya.

Dinala si Haranain sa Zamboanga City Medical Center ngunit idineklarang patay sa ospital.

Patuloy ang operasyon ng mga pulis laban sa mga hinihinalang miyembro ng Abu Sayyaf sa lugar.