Krimen sa Metro Manila, nabawasan nitong Pebrero

Bumaba ng 37.06 percent ang crime rate sa Metro Manila sa ikalawang buwan ng 2025, ayon kay National Capital Region Police Office (NCRPO) acting chief Brig. gen. Anthony Aberin nitong Linggo.

Sa isang news release, sinabi ni Aberin na nakapagtala ang NCRPO ng 343 focus crimes noong Pebrero, mas mababa sa 545 na naitala sa parehong buwan noong nakaraang taon.

Kabilang sa mga tinutukoy na focus crimes ang murder, homicide, physical injury, rape, theft, robbery, vehicle at motorcycle theft.

Batay sa datos  mula sa Crime Information, Reporting and Analysis System, ang murder cases ay bumaba ng 41.94 porsiyento mula 31 noong Pebrero 2024 hanggang 18 noong Pebrero 2025, habang ang homicide ay bumaba ng 25 porsiyento mula 12 hanggang siyam na kaso.

Samantala, ang physical injury at rape cases ay parehong bumaba ng halos 50 percent, mula 57 hanggang 29 cases (-49.12 percent) at 91 hanggang 46 cases (-49.45 percent), ayon sa pagkakabanggit.

Bumaba rin ang robbery cases sa 33.73 percent mula 83 hanggang 55, at theft cases ng 33.62 percent mula 229 hanggang 152.

Bumaba rin ang mga kaso ng carnapping noong Pebrero, kung saan bumaba ang carnapping ng sasakyan ng motor ng 57.14 percent mula pito hanggang tatlong kaso, at carnapping ng motorsiklo ng 11.43 percent mula 35 hanggang 31.

Sinabi ni Aberin na tumaas ng 8.68 percentage points ang crime solution efficiency mula 67.71 percent noong Pebrero 2024 hanggang 76.38 percent noong Pebrero 2025.

“We understand that some may not immediately feel the impact of these improvements, but the numbers speak for themselves,”  ayon kay Aberin sa isang statement.

Iniuugnay ng hepe ng NCRPO ang pagbaba ng mga kaso ng focus crime sa “pinatibay na visibility ng pulisya, mga operasyong nakabatay sa intelihensiya, at mas pinagtibay na pakikipag-ugnayan sa komunidad.”