NAVOTAS, PINASINAYAAN ANG DALAWANG BAGONG MULTIPURPOSE BUILDINGS

LALO pang pinapalawak ng Pamahalaang Lungsod ng Navotas ang kanilang pampublikong imprastraktura, kasunod ng pagbabasbas at pagpapasinaya sa dalawang bagong itinayong tatlong palapag na multipurpose buildings sa Tumana, Barangay NBBS Dagat-dagatan, at Phase 1C, Barangay NBBS Kaunlaran.

Nagtatampok ang bawat multipurpose building ng basketball court, mga office space, function room, at parking slots upang tiyakin na ang mga residente ay may access sa mahahalagang pasilidad para sa parehong mga serbisyo ng gobyerno at pakikipag-ugnayan sa komunidad.

Ang Tumana multipurpose building ay pangunahing gagamitin para sa mga aktibidad ng kabataan at sports, habang ang Phase 1C na pasilidad ay ilalaan sa AI at robotics programs, na nagbibigay ng makabagong espasyo para sa pagsulong ng teknolohiya.

Binigyang-diin ni Mayor John Rey Tiangco ang kahalagahan ng mga bagong pasilidad na ito sa pagpapaunlad ng komunidad.

“Ang mga gusaling ito ay sumasalamin sa ating pangako na mabigyan ang bawat Navoteño ng maayos, ligtas, at maaasahang pasilidad. Nais nating matiyak na may sapat na espasyo ang ating mga mamamayan para sa kanilang pangangailangan at para mas mapaunlad ang kalidad ng kanilang buhay,” ani alkalde.

Samantala, binigyang-diin din ni Congressman Toby Tiangco ang pangako ng lungsod sa patuloy na pag-unlad.

“Patuloy nating pagsisikapan na mapalawak ang ating imprastruktura upang matugunan ang lumalaking pangangailangan ng ating mga kababayan. Ang mga bagong multipurpose buildings na ito ay patunay na ang pamahalaang lungsod ay patuloy na naglilingkod nang tapat at may dedikasyon,” pahayag niya.

Ang inagurasyon ng Tumana at Phase 1C multipurpose buildings ay kasunod ng matagumpay na pagbubukas ng mga kaparehong pasilidad sa Phase 1A at Phase 1B noong Nobyembre.

Ang mga istrukturang ito ay sumasalamin sa dedikasyon ng pamahalaang lungsod sa pagpapahusay ng paghahatid ng serbisyo publiko at pagpapaunlad ng isang mas malakas, at mas konektadong komunidad.