MAGKAPATID NA TIANGCO NANGUNA MULI SA JOB PERFORMANCE POLL

NANGUNA muli si Navotas Congressman Toby Tiangco habang nakuha naman ng kanyang kapatid na si Mayor John Rey Tiangco ang ikalawang puwesto sa isinagawang survey ng RP-Mission and Development Foundation Inc. (RPMD) noong September 20-30, 2023 sa third-quarter na pagganap ng mga mayor at mga kinatawan ng Metro Manila.

Nakamit ni Cong. Tiangco ang 95.3% job performance rating sa Boses ng Bayan poll para maging Top Performing Representatives sa National Capital Region (NCR) na ibinase sa District Representation, Legislative Performance at Constituent Service.

“Maraming salamat po, makaaasa kayong susuklian namin ng Toby Continued na pagsisikap na makapagbigay ng de-kalidad na programa at serbisyo para tuloy-tuloy ang Saya All sa ating lungsod at sa bawat Navoteño”. pahayag na pasasalamat ni Cong. Tiangco.

Samantala, si Mayor Tiangco naman ay nakakuha ng 92.7% approval ratings.

“Taos-pusong pasasalamat, mga Navoteño, sa inyong tiwala at suporta, isang karangalan po ang patuloy na kayo’y mapaglingkuran. Lalo pa nating pag-iigihan ang paghahatid ng Serbisyong All The Way upang mapataas pa ang kalidad ng buhay sa Navotas”. pasalamat naman ni Mayor Tiangco.

Ang magkapatid na Tiangco ay parehong top placer sa mga independent survey na regular na isinasagawa ng RPMD para pasiglahin ang accountability, transparency, at epektibong pamamahala sa bansa. (JUVY LUCERO)