BINATA PINALIGUAN NG BALA SA LOOB NG COMPUTER SHOP

Patay ang isang lalaki matapos pagbabarilin ng hindi kilalang mga suspek sa loob ng isang computer shop kahapon ng madaling araw sa Caloocan City.

Sa inisyal na imbestigasyon ng  Caloocan City Police, dakong alas 3 ng madaling araw naganap ang pamamaril kay Crisanto Arisme, 22, sa loob ng computer shop sa Sto Nino de Maligaya St., Brgy. 177.

Nagko-computer umano ang biktima sa naturang lugar nang biglang pumasok ang dalawang hindi kilalang lalaki at walang sabi sabing pinagbabaril ito sa ulo at katawan.

Matapos ang insidente ay mabilis na tumakas ang mga suspek sa hindi matukoy na direksyon.

Ayon sa ama ng biktima, wala siyang alam na kaaway ng kanyang anak subalit, sinabi ng nanay nito na minsan na umanong nasangkot ang anak sa iligal na droga.

Patuloy naman ang follow up imbestigasyon ng pulisya para sa posibleng pagkakilanlan at pagkakaaresto sa mga suspek habang inaalam pa ang tunay na motibo sa insidente.