2 tulak arestado sa Navotas drug bust

BAGSAK sa kulungan ang dalawang hinihinalang drug personalities matapos matimbog ng pulisya sa isinagawang buy bust operation sa Navotas City, kahapon ng madaling araw.

Kinilala ni Navotas police chief P/Col. Mario Cortes ang naarestong mga suspek na sina alyas “Jenny”, 45 ng Barangay NBBS Kaunlaran at alyas “Dre”, 40 ng Tondo Manila.

Sa kanyang ulat kay Northern Police District (NPD) Director P/BGen. Rizalito, sinabi ni Col. Cortes na nakatanggap ng impormasyon ang Station Drug Enforcement Unit (SDEU) hinggil sa umano’y illegal drug activities ni Jenny kaya isinailalim nila ito sa validation.

Nang positibo ang report, ikinasa ng mga operatiba ng SDEU sa pangunguna ni P/Cpt. Genere Sanchez ang buy bust operation sa Ayungin St., Brgy., NBBS Kaunlaran na nagresulta sa pagkakadakip sa mga suspek dakong alas-4:05 ng madaling araw matapos bintahan ng P500 halaga ng shabu ang isang pulis na nagpanggap na buyer.

Nakumpiska sa mga suspek ang nasa 5.28 grams ng umano’y shabu na may standard drug price value na P35, 904.00 at isang P500 bill na ginamit bilang buy bust money.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002.