2 HVI drug suspects, kulong sa P381K shabu sa Navotas

NASABAT sa dalawang high value drug suspects ang halos P.4 milyong halaga ng shabu nang maaresto ng pulisya sa ikinasang buy bust operation sa Navotas City, kamakalawa ng gabi.

Kinilala ang naarestong mga suspek na sina alyas “Jayson”, 43, (listed/pusher) at alyas “Matey”, 28, (pusher/listed) na kapwa residente ng lungsod.

Nabatid na nakatanggap ng impormasyon ang mga operatiba ng Station Drug Enforcement Unit (SDEU) hinggil sa umano’y illegal drug activities ng mga suspek kaya isinailalim nila ang mga ito sa validation.

Nang positibo ang ulat, ikinasa ng SDEU ang buy bust operation na nagresulta sa pagkakaaresto sa mga suspek dakong alas-11:33 ng gabi sa Goldrock St., Brgy., San Roque.

Nakumpiska sa mga suspek ang humigi’t kumulang 56.17 grams ng hinihinalang shabu na may standard drug price value na P381,956.00 at buy bust money.

Sasampahan ang mga suspek ng kasong paglabag sa RA 9165 o ang Comprehensive Dangerous Drug Act of 2002 sa Navotas City Prosecutor’s Office.