2-anyos patay, nanay sugatan sa hit and run sa Navotas

PATAY ang isang dalawang taon gulang na batang lalaki habang malubha namang nasugatan ang kanyang ina matapos ma-hit and run ng isang trailer truck sa Navotas City, kamakalawa ng gabi.         

Binawian ng buhay sanhi ng tinamong pinsala sa ulo at katawan ang biktimang si Markgil Jabuena Jr, habang patuloy naman na inoobserbahan sa Tondo Medical Center ang kanyang ina na si Shirley Raagas, 32, kapwa ng Blk 12 Pama Sawata, Brgy. 28, Caloocan City.

Batay sa salaysay ng saksing si Donalyn Tadeo, 36 ng Blk 26 Lot 26 Ph 2, Brgy. NBBS Dagat-dagatan, Navotas City kay PCpl Florencio Nalus, habang binabagtas niya ang C3 Road patungong Agora Market sakay sa kanyang bisikleta dakong alas-7:30 ng gabi nang makita niya ang isang trailer truck na mabilis ang takbo.

Pagsapit sa C3 Brigde, Brgy., NBBS Kaularan, nasagi at nabangga ng naturang trailer truck ang mga biktima na patawid sana sa nasabing lugar na nagresulta ng agarang kamatayan ng bata.

Hindi naman huminto ang driver ng naturang truck at mabilis na tumakas patungong Road 10 sa Manila area habang isinugod naman ang ina ng bata sa nasabing pagamutan.

Nagsasagawa na nang masusing imbestigasyon ang pulisya para sa posibleng pagkakilanlan at pagkakaaresto sa suspek. (JUVY LUCERO)