Welcome ang lahat na makilahok sa PH swimming tryouts– Cong. Buhain

HINIMOK ni swimming legend Batangas 1st District Congressman Eric Buhain ang lahat ng Pilipino swimmers na lumabas, makiisa at lumahok sa isasagawang national try-outs ng Stabilization Committee para sa binubuong Philippine swimming team na isasabak sa 30th Southeast Asian Games sa Cambodia sa Mayo.

Iginiit ng two-time Olympian at Southeast Asian Games record-holder na nakapanghihinayang ang pagkakataon na ibinigay ng World Aquatics sa Philippine swimming community kung babalewalain ng mga atleta, coaches at swimming club managers, gayundin ng iba pang stakeholders ang itinakdang try-outs para mapili ang mga tunay na ‘deserving’ swimmers para sa Philippine Team.

“Libre ito. For the first time after more than two decades na magkakaroon ng national try-outs na open for all swimmers, kaya hinihikayat ko ang lahat na lumahok dito. Itong nangyari sa Philippine swimming ay dapat nating ipasalamat dahil natapos na ang problema. Kalimutan na natin ang animosity, magkaisa na tayo para sa iisang layunin na magkaroon ng tunay na development sa ating sports,” pahayag ni Buhain sa kanyang pagbisita sa Tabloids Organization in Philippine Sports, Inc. (TOPS) ‘Usapang Sports’ nitong Huwebes sa Philippine Sports Commission (PSC) Executive Lounge sa loob ng Rizal Memorial Sports Compex.

“Ang mensahe ko, sumali kayo, pagkakataon na natin ito. Actually, matagal na natin itong pinagdasal ay may isang anghel na sumagot sa atin at yan ang Philippine Olympic Committee (POC). Pinakingan tayo at nagkaroon ng pagkakataon. Lahat welcome, niyayakap tayo ng Stabilization Committee.

“Go there and test your abilities against the best Filipino swimmers. Sa Cambodia SEA Games, ito na ang umpisa ng inclusivity sa Philippine swimming,” sambit ni Buhain sa lingguhang forum na itinataguyod ng Philippine Sports Commission at Behrouz Persian Cuisine.

Sa pakikipagtulungan ng Asian Swimming Federation, nabuo ng Stabilization Committee ang selection criteria at itinakda ang National try-outs sa swimming, gayundin sa water polo at diving sa Pebrero 16-19 sa Clark Aquatics Center sa Capas, Tarlac.

Mismong ang ASF ang nangansiwa sa training ng may 60 technical officials na siyang mangangasiwa sa tryouts.

“Huwag nating sayangin ang pagkakataon. Ang importante looking forward na tayo. Nakikita na natin ang kinabukasan ng ating mga swimmers at ng sports,” pahayag ni Buhain.

Ang swimming events na kailangang lahukan sa SEA Games ang ang men and women 50, 100, 200, 200, 800 at 1,500 meters freestyle; 50, 100 at 200 meters butterfly, backstroke at breaststroke; at 200 and 400 individual medley.

Sa panig ng fin-swimming na hiwalay na asosasyon, sinabi ni Buhain, pangulo rin ng Congress in Philippine Aquatics, Inc. (COPA), na naging matagumpay ang pakikipagtulungan nila sa Philippine Finswimming Federation, Inc. (PFFI) at naisagawa ang tryouts na isinagawa sa Luzong , Visayas at Mindanao para matukoy ang apat na lalaki at apat na babaeng isasabak sa Sea Games.

“Sa finswimmingm ito yung event sa bi-swimming at monofin. Naisagawa na natin an tryouts at nakabuo na ng team si coach  Mary Ann Reyes,” sambit ni Buhain.

Sa pamamagitan ni POC president Bambol Tolentino lumagda ng kasunduan ang COPA at PFFI sa pamumuno ni Maria Tatjana Claudeene Medina para pangasiwaan ng COPA ang tyryouts.

Nakatakda ang Cambodia SEA Games sa Mayo 5 -17.