WALANG DENGUE OUTBREAK SA MAYNILA

Inanunsyo ni Mayor Honey Lacuna na walang dengue outbreak sa Maynila, habang inatasan din niya ang Manila Health Department na pinamumunuan ni Dr. Arnold Pangan, mga opisyal ng barangay, at mga hepe ng distrito ng ospital na palakasin ang kanilang mga hakbang laban sa dengue.

“Sa tulong ng Dengue Surveillance Report ng Manila Health Department, inutusan ko ang MHD at ang Manila Disaster Risk Reduction and Management Office na mag-deploy ng karagdagang anti-mosquito larvae (larvicide) kits sa mga barangay kung saan may pagtaas ng kaso ng dengue.” Pinalakas din namin ang mga operasyon ng misting,” ayon sa alkalde.


Ayon kay Lacuna, malinaw na walang dengue outbreak sa Maynila dahil ang case fatality rate nito ay nasa 0.62% lamang at ang attack rate ay 7.18 lamang. Ang attack rate na 10 hanggang 100 bawat 10,000 populasyon ay itinuturing na mataas, lalo na kapag tumatagal sa paglipas ng panahon o nangyayari sa isang mataong lugar.

Sa 897 barangay sa Maynila, 25 ang natagpuan na may pagdami o pagtaas ng kaso ng dengue at karamihan sa mga naapektuhan ay may edad na lima hanggang 39.

Ang pinakamataas na bilang ng mga kaso ay natagpuan sa mga Distrito 1, 5 at 6. Apat ang naiulat na namatay at tatlo sa kanila ay mula sa Distrito 3. Sa kabuuan, 51 barangay ang isinailalim sa misting hanggang Pebrero 14.

“Ang kabuuang bilang ng barangay dito sa Maynila ay 897. Ang total population ng Maynila ay nasa 1.91 million. Kaya kung ibabangga dito ang bilang ng dengue cases buong lungsod, malinaw na malayung-malayo ang Maynila sa ‘outbreak’ level,” sinabi ni Lacuna.

“Ligtas sa ngayon ang buong lungsod sa panganib ng dengue, ngunit hindi tayo nagpapaka-kampante. Bagkus, daragdagan pa nga natin ang mga supply ng gamot at vitamins sa mga health centers at super health centers, upang mapalakas ang resistensya ng mga residente,” dagdag pa ng ginang alkalde.

Inutusan din niya ang mga tauhan ng health center, mga barangay health worker, mga nutrition scholar, at mga sanitation specialist na isama sa mga pagsisikap na hanapin at sirain ang mga pinagkukutaan ng mga lamok, tulad ng mga bubog at mga mini gardens.



“Diyan kasi naiipon ang mga tubig ulan at notoryus na pinangingitlugan ang mga dengue-carrying mosquitoes,” sabi niya. ARSENIO TAN