SENIOR CITIZENS NG NAVOTAS, MAKAPANOOD NA MULI NG LIBRENG SINE

MULING makapanood na ng libreng sine ang mga senior citizens ng  Navotas City makalipas ang mahigit dalawang taon pananatili sa loob ng kanilang bahay dahil sa nakakamatay na sakit na COVID-19.

Personal na sinamahan nina Navotas City Mayor Toby Tiangco at Congressman John Rey Tiangco ang mga chapter presidents ng Office of Senior Citizens Affairs (OSCA) ng lungsod sa Fisher Mall – Malabon kung saan gaganapin ang unang araw na pagbubukas muli ng libreng sine para sa mga senior citizens.

Ayon kay Mayor Tiangco, tuwing Lunes at Martes, 10am hanggang 5pm, puwedeng manood nang libreng sine ang mga senior citizens at kailangan lang dalhin ang kanilang senior ID.

Gayunman, palagi pa rin ipinaalala ni Mayor Tiangco na mag-ingat ang lahat lalo na ang mga senior citizens dahil nasa paligid lang aniya ang nakakamamatay na virus.

“Kahit dalawa na lamang ang active cases sa ating lungsod ay kailangan pa rin natin ang pag-iingat, sumunod sa mga health at safety protocols at magpa-booster na para maabot na natin ang zero cases,” pahayag ni Mayor Toby.

Masaya at lubos naman ang pasasalamat ng mga senior citizens ng lungsod sa magkapatid na Tiangco dahil sa mga programa ng mga ito na malaking tulong anila sa para sa kanila.