SAN MIGUEL BEERMEN PATULOY SA PAMAMAYAGPAG

PATULOY ang paghahari ng San Miguel Beermen sa 2024 PBA Philippine Cup.

Ito’y matapos talunin ng SMB ang Blackwater Bossing, 124-109, sa kanilang naging laro ngayong araw sa PhilSports Arena sa Pasig City.

Kumana si CJ Perez ng 26 puntos, 5 rebound at assists habang umiskor ng 25 puntos si Don Trollano na may lima ring rebound at assists, at anim na tres.

Hindi rin nagpadaig si June Mar Fajardo para sa Beermen nang makapagtala siya ng 21 puntos, 16 rebound at ang mga kumumpleto sa players na tumapos sa double digits ay sina Jericho Cruz (14), Terrence Romeo (12), at Marcio Lassiter (11).

Kahit na wala pang talo at may sampung sunod-sunod na panalo, nakatutok pa rin si Coach Gallent sa kanilang susunod na assignment: ang Meralco Bolts.

”It’s not over yet,” tugon ng one-time PBA champion mentor nang tanungin kaugnay sa kanilang elimination round campaign.

”We still have the 11th step. It’s not over, and of course, I have to downplay it because it did not happen yet. If it happens, lucky for us, but we need to move on to our next ladder.” RON TOLENTINO