QC MAGSASAGAWA NG SWAB TESTING SA BAR EXAMINEES

Ipinahayag ng lokal na pamahalaan ng Quezon City ang kanilang suporta sa bar examinations ngayong taon dahil inatasan nito ang swab testing team na magsagawa ng pagsusuri sa 756 examinees at 350 personnel at volunteers sa bar exams na gaganapin ngayong linggo.

Sinabi ni Mayor Joy Belmonte na titiyakin nito na ang lahat ng indibidwal na kasama, lalo na ang mga examinees, ay ligtas sa exposure at hindi magiging superspreader event ang aktibidad.

“Kami ay mahigpit na nakikipag-ugnayan sa Korte Suprema pati na rin sa mga administrador mula sa Unibersidad ng Pilipinas, dahil ang Unibersidad ay napili bilang isa sa mga testing sites. Iisa ang layunin natin sa kanila at iyon ay upang matiyak ang kaligtasan ng examinees at ang tagumpay ng mga pagsusulit sa Pebrero 4 at 6,” sabi ni Belmonte.

Ayon sa mga paunang talakayan, sumang-ayon ang Korte Suprema na magbigay ng test kits habang ang Quezon City Epidemiology and Disease Surveillance Unit (QCESU) ay magsasagawa at mangangasiwa sa rapid antigen testing sa mahigit 1,100 indibidwal na kasama.

Ang QCESU ay maglalaan ng 20 health personnel para sa testing activities, na gaganapin sa Pebrero 2 para sa mga bar examinees at Pebrero 3 para sa mga tauhan at boluntaryo, kapwa sa UP College of Human Kinetics Gymnasium.

Sinumang magpositibo ay susuriin at ire-refer para sa home quarantine o para sa agarang paglipat sa alinman sa HOPE Community Care na pasilidad ng lungsod.

Ang iba pang Departamento ng Pamahalaang Lungsod ng Quezon ay nagsasagawa rin ng mga kinakailangang paghahanda upang tumulong sa swab testing at bar examinations.

Ang QC Disaster Risk Reduction and Management Office (QCDRMMO) at Quezon City Fire District (QCFD) ay magtatayo ng mga tent sa UP Campus at naka-standby para sa anumang emergency.

Gayundin, ang QC Task Force for Transport and Traffic Management (QCTFTTM) ay inatasan na mapanatili ang maayos na daloy ng trapiko sa malapit na paligid ng campus.

“Tiyakin na ibibigay namin ang lahat ng suportang kailangan at ang mga isyu tungkol sa kalusugan o kaligtasan ay ang pinakamaliit sa iyong mga alalahanin. We wish all the examinees the best of luck,” ani Belmonte.