Problemado sa pera, housewife nagbigti

NAGPAKAMATAY ang isang 28-anyos na housewife sa pamamagitan ng pabigti sa sarili dahil umano sa pinansiyal na problema sa Malabon City, Biyernes ng madaling araw.

Alas-1:30 ng madaling araw nang madiskubre na nakabigti ang biktimang si Julie Ann Japitana ng kanyang live-in partner na si Felix Macababat, 38, sa kusina ng kanilang bahay sa 3^rd St., Brgy. Tañong gamit ang isang kumot na nakapulupot sa kanyang leeg habang ang kabilang dulo ay nakatali naman sa wooden beam ng bahay.

Ayon kina homicide investigators P/MSgt. Julius Mabasa at P/SSgt. Ernie Baroy, kaagad pinutol ni Macababat ang kumot bago mabilis na isinugod ang kanyang live-in partner sa Ospital ng Malabon subalit, i-dineklara itong dead on arrival.

Sinabi ni Macababat sa mga imbestigador na bago ang insidente, siya at ang biktima ay nag-inuman sa bahay ng kapatid na babae ng kanyang live-in partner na katabing bahay lang nila at pagkatapos nito ay umuwi na sila bandang alas-12:00 ng hating gabi.

Dakong ala-1:30 ng madaling araw, nagising si Macababat dahil sa iyak ng kanilang 2-anyos na anak at napansin niya na wala sa tabi ng bata ang kanyang live-in partner hanggang sa magulat na lang ito nang madiskubre ang bangkay ng biktima na nakabigti sa kusina.

Ayon kay Malabon police chief P/Col. Jessie Tamayao, kasalukuyang pa rin iniimbestigahan ang naturang kaso habang hinihintay ang resulta ng autopsy examination na isinagawa ng Northern Police Distrrict (NPD) Crime Laboratory.