PILIPINAS, VAT-FREE NA SA FOREIGN TOURISTS

Libre na sa Value-Added Tax (VAT) ang mga dayuhang turista sa Pilipinas kasunod ng paglagda sa implementing rules and regulations (IRR) ng Republic Act No. 12079 o ang VAT Refund for Non-Resident Tourists nitong Lunes, Marso 24.

Layon ng batas na palakasin ang turismo at hikayatin ang mga dayuhang turista na gumastos sa bansa, na magpapalago sa ekonomiya.

Nilagdaan ang IRR ni DOF Secretary Ralph Recto, kasama sina Bureau of Customs (BOC) Commissioner Bienvenido Y. Rubio at Bureau of Internal Revenue (BIR) Deputy Commissioner Marissa O. Cabreros, noong Marso 24, 2025. Sinaksihan ito nina Department of Tourism (DOT) Secretary Christina Garcia-Frasco at Office of the Special Assistant to the President for Investment and Economic Affairs (OSAPIEA) Secretary Frederick D. Go.

Sa ilalim ng IRR na niladaan , ang mga non-resident tourist o mga foreign passport holder ay maaaring mag-aplay para sa VAT refund sa mga produktong binili mula sa accredited stores na may halagang hindi bababa sa P3,000.

Kailangang nailabas sa Pilipinas ang mga produkto sa loob ng 60 araw mula sa date of purchase.

Ang VAT refund ay para lamang sa mga retail at tangible good gaya ng damit, gadget, alahas, accessory, souvenir, pagkain o non-food consumable at iba pang produkto para sa personal use.

“With a multiplier effect of 1.97, every 100 pesos spent by a tourist generates 197 pesos in economic output. Imagine that. Halos doble ang balik sa ekonomiya,” sabi ni Finance Secretary Ralph Recto.

“And more money spent by foreign tourists means more businesses created, more Filipino workers hired, more jobs provided, higher incomes for our people and more revenues for the government to collect. That’s the simple formula for growth,” dagdag pa niya.