PILIPINAS TINANGGAL SA ‘GREY LIST’ NG FATF

Matapos ang mahigit tatlong taon, opisyal nang natanggal ang Pilipinas sa grey list ng Financial Action Task Force (FATF), isang pandaigdigang organisasyong nagbabantay sa money laundering at terorismong pinansiyal.

Sa statement nitong Biyernes, inihayag ng FATF ang desisyon nito matapos ang masusing pagsusuri sa mga repormang ipinatupad ng bansa upang mapalakas ang regulasyon at pagpapatupad ng mga batas laban sa illegal na transaksyong pinansiyal.

“The plenary agreed to take the Philippines off the grey list in recognition of the completion of their action plan, which was agreed in June of 2021. Amongst other efforts and results, the Philippines is now actively combating the risk of dirty money flowing through casinos in the country,” ayon kay FATF President Elisa de Anda Madrazo sa hiwalay na briefing.

“The Philippines is expected to sustain the implementation of the reforms and importantly to do so in a way that is consistent with the FATF standard. The country will continue to work with the Asia-Pacific Group (APG) on money laundering and will start preparing soon for their next evaluation.”

Ang FATF, isang pandaigdigang tagapagsuri na nangangasiwa sa higit 200 bansa at hurisdiksyon, ay bumubuo ng grey list para sa mga bansang may kahinaan sa kanilang anti-money laundering (AML) at counter-terrorism financing (CTF) policies. Ang pagkakaalis ng Pilipinas sa listahang ito ay isang patunay sa matagumpay na pagpapatupad ng mahahalagang reporma upang palakasin ang sistema ng pananalapi laban sa mga iligal na gawain.

“The FATF Plenary congratulated the Philippines for the positive progress in addressing the strategic anti-money laundering and countering the financing of terrorism and proliferation financing deficiencies that had been identified,” ayon sa pahayag ng FATF matapos ang kanilang regular na pagpupulong.

Nagpatupad ang pamahalaan ng Pilipinas ng mga makabuluhang batas at regulasyon upang matugunan ang mga rekomendasyon ng FATF, kabilang ang mas mahigpit na pagbabantay sa mga transaksyong pinansyal, pagpapalakas ng koordinasyon ng mga ahensiyang nagpapatupad ng batas, at pagpapataw ng mas mabigat na parusa sa mga lumalabag sa batas. Ang matagumpay na implementasyon ng mga repormang ito ay nagresulta sa pag-alis ng Pilipinas sa ilalim ng masusing pagmamanman ng FATF, na inaasahang magpapalakas ng kumpiyansa ng mga mamumuhunan at magpapabuti sa reputasyon ng bansa sa pandaigdigang sistema ng pananalapi.

Bagamat natanggal na ang Pilipinas sa grey list, ang Laos at Nepal ay isinama, na nagdala sa kabuuang bilang ng mga bansang nasa listahan sa 25. Kasama sa listahang ito ang Bulgaria, Croatia, Haiti, Monaco, Nigeria, South Sudan, at Yemen.

Nilinaw ng FATF na ang pagkakasama sa grey list ay hindi nangangahulugan ng direktang parusa, ngunit isang indikasyon na kailangang ipagpatuloy ng isang bansa ang pagsasagawa ng mga kinakailangang hakbang upang mapunan ang mga natukoy na kakulangan. “Being added to the grey list means the country has committed to implementing an action plan to resolve swiftly the identified strategic deficiencies within agreed timeframes,” ayon sa FATF.

Samantala, ang FATF ay may hiwalay na blacklist para sa mga bansang may seryosong kakulangan sa AML at CTF measures. Kasalukuyang kabilang sa blacklist ang Iran, Myanmar, at North Korea.

Malugod na tinanggap ng pamahalaang Pilipino ang desisyong ito, na sinasabing patuloy itong magsusulong ng mga reporma upang mapanatili ang pagiging transparent ng pananalapi ng bansa at maiwasan ang pagbabalik sa grey list sa hinaharap.