PAGBIBIGAY NG SAHOD SA SK, ISINUSULONG

Kumpiyansa si House Committee on Ways and Means chairperson at Albay Rep. Joey Salceda na maipasa agad ng Kongreso ang inakda niyang House Bill 1667 o Sangguniang Kabataan (SK) Compensation Act.

Inilabas ni Salceda ang pahayag matapos aprubahan sa ‘second reading’ kamakailan ng Senado ang sariling bersyon nito ng panukala kung saan nakapaloob, hindi lamang ang pagpapasahod sa mga halal na opisyal ng SK kundi pati ang pagbibigay sa kanila ang ‘civil service eligibility’ na layunin din ng nauna niyang panukalang HB 1030.

“Compensating SK officials sends a strong signal that the State expects the degree of professionalism and dedication it expects of other paid government officials. It signifies that the State takes seriously the work of the SK,” saad ni Salcenda.

Kasalukuyang pending ang HB 1667 sa House Committee on Local Government.

Sa ilalim ng HB 1667 ni Salceda na aamyenda sa RA 10742, ang  Sangguniang Kabataan Reform Act of 2015, panukalang pasahurin ang SK Kagawad katumbas ng kalahati ng buwanang pasahod sa Barangay kagawad na umaabot sa P6,250, depende sa antas ng pana­nalapi ng barangay.

“Dahil sa gaga­wing institusyunal na ang pasahod, kailangan ding ga­wing maliwanag kung ano ang aasahan natin sa SK”, wika ni Salceda.