P1.6 DROGA NASABAT SA HVI AT 2 KASABWAT SA CALOOCAN BUY-BUST

TIKLO ang tatlong drug suspects, kabilang ang isang itinuturing bilang High Value Individual (HVI) nang makuhanan ng mahigit P1.6 milyong halaga ng droga matapos matimbog sa buy bust operation sa Caloocan City, Lunes ng umaga.

Kinilala ang mga suspek na sina “Mike”, 44, band member, alays “Rose”, 35, tattoo artist at alyas Marj”, 27.

Ikinasa ng mga operatiba ng Station Drug Enforcement Unit (SDEU), sa koordinasyon sa PDEA ang buy bust operation matapos magpositibo ang natanggap na ulat hinggil sa umano’y ilegal drug activities ni alyas Mike.

Nang matanggap ang senyas mula sa kanyang kasama na nagpanggap na poseur buyer na hudyat na positibo na ang transaksyon, agad lumapit ang back up na operatiba saka inaresto ang mga suspek dakong alas-11:34 ng umaga sa Phase 5A, Package 3, Bagong Silang, Barangay 176.

Nakumpiska sa mga suspek ang nasa 1,000 grams ng high-grade Kush na nagkakahalaga ng P1,400,000 at 2,170 grams ng pinatuyong dahon ng marijuana na nagkakahalaga ng P260,400, na may kabuuang halaga na P1,660,400.00, buy-bust money, at asul eco bag.

Mahaharap ang mga suspek sa kasong paglabag sa Sections 5, 26, at 11 ng Article II ng RA 9165 o ang Comprehensive Dangerous Drugs Act of 2002.