Nanghampas, nandura, nanadyak | BABAENG CHINESE NAGWALA SA DAAN, ARESTADO

PRESINTO ang bagsak ng isang babaeng Chinese na namalo ng payong sa police Makati at kalauna’y nang-away sa dumadaan na biker.

Naging viral sa Facebook ang video ng pakikipagtalo ng 27-anyos na si Dong Li sa mga traffic enforcer dakong alas-5:15 ng hapon noong Hulyo 7 sa panulukan ng Makati Ave at Jupiter Street sa Brgy. Bel Air sa nasabing lungsod.

Ayon sa siklistang kinilalang si Jefferson Reyes na pinaghahampas ng babae, nauna nang binanatan umano nito ang enforcer na nagbabawal dito na tumawid sa kalsada dahil pula pa ang traffic light.

https://www.facebook.com/jhyz0n3/videos/10216445948770550/

Nang makita ni Reyes ang pangyayari ay sinigawan niya umano ang Chinese para awatin.

Dito na siya pinagbalingan ng galit ng babae at ito na rin ang eksenang sapul sa kamera kung saan pinaghahampas na siya.

Hindi rin nakaligtas sa galit ng babae ang isa pang security guard maging ang nasa sasakyan na kumukuha ng viral na video.

Maya-maya pa, ay dumiretso umano ang babaeng Chinese sa isang restaurant at dito ay muli raw nagwala at nanira ng mga gamit.

Dito na siya pinosasan ng rumespondeng security guard; imbes na tumahimik ay dinuruan pa niya ang sekyu.

Nahaharap sa kasong physical injury at disobedience to person of authority ang nasabing Chinese national.