MVP Smart PAI national tryouts.. ANG GARA NG PH QTS NI GARRA PARA SA MALAYSIA TILT

WINALIS ni  Sophia Garra ng WaveRunners Swim Club ang tatlong nilahukang event sa pamamagitan ng Qualifying Time Standard (QTS) para pamunuan ang 10 top podium finishers na nakakuha ng marka sa katatapos lang na MVP/Smart-PAI National Tryouts para sa 47th Southeast Asia (SEA) Age-Group Championships nitong weekend sa Teofilo Ildefonso Aquatics Center sa Manila.

Ang 13-taong-gulang na junior standout mula sa Malabon City at protegee ng 2000 Sydney Olympian na si Jenny Guerrero ay agaw atensyon nang tampukan ang backstroke events— girls 11-13 50-m, 100-m, at 200-m— para awtomatikong mapabilang sa Philippine Team na lalahok sa taunang regional championship.

Nanguna si Garra, isang Palarong Pambansa at Batang Pinoy multi-medalist, sa 50-m sa oras na 31.00 segundo, tinalo ang 31.16 QTS, habang nag-oras ng 1:06.65 para itugma ang QTS sa 100-m, bago nakuha ang kanyang ikatlong gintong medalya sa 200-m sa 2:4:23. Ang kanyang pinakamalapit na karibal na si Jordane Porsche Sales ng Aquaventure ay pumangalawa sa lahat ng tatlong kaganapan.

Ito ang ikalawang pagkakataon para kay Garra na magsuot ng pambansang kulay sa prestihiyosong torneo na nakatakda ngayong Agosto sa Malaysia. Nagawa niya ito noong nakaraang taon sa Thailand na may dalawang QTS-breaking performances.

Makakasama niya sa koponan ang ilang miyembro rin ng PH Team noong nakaraang taon, kabilang ang Asian SEA Age Championships gold medalist na si Jamesray Mischael Ajido ng Royals Swim Club, Fil-British Alexander Eicler, Kyla Bulaga ng La Union, Patricia Santor ng Ilustre East, Fil-Briton Rhianna Chantele Coleman ng Dax Sim Club, Ryian Zach Denzel Belen ng FTW Royals, at Albert Jose Amaro ng San Beda College.

Si Ajido, ang nag-iisang Filipino gold medal winner (boys 12-14 100m butterfly, 55.98) at record breaker sa Asian Age Group tilt noong nakaraang taon sa Capas, Tarlac, ang namuno sa boys’ 16-18 100m butterfly, na nagtala ng 55.40 segundo, na pumasa sa QTS.55.64. Ang La Salle Greenhills phenom ay pumangatlo sa 50-m fly na napanalunan ni Eichler (25.03) sa oras na 25.37 segundo, ngunit sapat na upang talunin ang QTS sa 25.48. Nakuha ni Amaro ang pilak at nag-qualify din sa oras na 25.36.

Ang 16-anyos na si Coleman, isang iskolar sa National Academy of Sports sa Clark, ay nakakuha rin ng isa pang pagkakataon na magsuot ng National color nang inangkin niya ang ginto sa girls 16-18 100-m breaststroke sa oras na 1:14.38, dalawang-sampung bahagi lamang ng isang segundo na mas mahusay kaysa sa QTS.

Nakapasa rin sa QTS sina Ryian Zach Denzel Belec ng FTW Royals sa boys 16-18 50m back clocking 26.89 (QTS, 26.90); Kyla Louise Bulaga ng La Union Bull Sharks sa girls 14-15 200m butterfly (2:21.17/2:25.39); Nalampasan ni Cruz ang 2:27.22 QTS sa girls 16-18 200-m back sa oras na 2:23.85, habang si Patricia Mae Santor ay nalampasan ang 2:26.22 QTS sa girls 16-18 200m butterfly na nagtala ng 2:21.00 at si Bautista ang nanguna sa girls 510-18 oras ng 28.04 at 1:03.52, na pumasa sa QTS na 28.88 at 1:03.56, ayon sa pagkakabanggit.

Ang iba pang gold medalists ngunit nabigong talunin ang QTS ay sina Titus Sia, 13, na nanguna sa boys 11-13 1500 freestyle (18:06.90) at 200m freestyle (2:08.75); Paulo Dominick Della Anton sa boys 16-18 200m free (2:01.47); Anya Dela Cruz sa girls 11-13 200m free (2:22.74); Ana David 14-15 klase (2:12.25); Billie Blue Mondonedo sa girls 16-18 200m libre (2:11.19). (DANNY SIMON)