Ibinunyag ng Commission on Human Rights (CHR) na maraming istasyon ng pulisya ang ayaw magbigay ng mga dokumento kaugnay ng extrajudicial killings (EJK), sa kabila ng kanilang mga pormal na kahilingan.
Sa pagdinig sa Kamara para sa budget ng ahensya, sinabi ni CHR Chairperson Richard Palpal-latoc na ginagamit ng ilang police stations bilang legal na depensa ang Executive Order No. 2 o ang Freedom of Information (FOI) order na ipinalabas noong panahon ni dating Pangulong Rodrigo Duterte.
“We have been issuing show cause orders. But I think the legal defense of the Philippine National Police is the Executive Order No. 2 and the list of exceptions,” paliwanag ni Palpal-latoc, sabay banggit na may ilang istasyon ang sumunod sa subpoena, pero karamihan ay patuloy na tumatanggi.
Mariing tinutulan ito ni Akbayan party-list Rep. Chel Diokno, na nagsabing “totally unacceptable” ang hindi pagbibigay ng records, at iginiit na maaaring magsampa ng kaso para ma-cite in contempt ang mga hindi nakikipag-cooperate.
Para naman kay ACT Teachers party-list Rep. Antonio Tinio, hindi puwedeng gamiting dahilan ang FOI order laban sa CHR dahil hindi ito isang ordinaryong mamamayan kundi isang constitutional body na may mandato na magsiyasat.
“Hindi puwede ‘yung tatakpan ng EO ang tungkulin ng CHR. Nasa ICC na si Pangulong Duterte dahil sa EJKs. Ang buong organisasyon ay may pananagutan. Kayo ang inaasahan na kumilos,” diin ni Tinio.
Tiniyak ni Palpal-latoc na hindi sila titigil sa imbestigasyon kahit pa may limitasyon ang mga dokumentong naibibigay. Ayon sa kanya, may CHR task force na nakatutok sa EJK cases, at target nilang tapusin ang unang 400 kaso bago matapos ang Nobyembre.
Sa kabuuan, tinatayang nasa 4,000 kaso ng EJK ang kanilang sisiyasatin.
About the Author
