MGA LOLO AT LOLA SA VALENZUELA, TATANGGAP NG FOOD PACKS

May kabuuang 55,466 na bilang ng lolo at lola sa Valenzuela City ang makatatanggap ng mga espesyal na food packs, alinsunod sa taunang tradisyon ng pamahalaang lokal.

Ayon kay Mayor Rex Gatchalian, ang tinaguriang “Food Pack nina Lolo at Lola,” ay programa na naglalayong mapanatiling masaya at malusog ang mga matatanda na nakatira sa 33 na mga barangay ng lungsod bilang ayuda sa gitna ng COVID-19.

Katumbas ng food packs ang voucher na ipamimigay sa mga lolo at lola na ipapamahagi ng pamahalaang lokal. Ang programang ito ni Mayor Gatchalian ay nasimulan sa unang buwan ng pandemiya sa panahon ng ECQ noong Marso.

Mula noong Hunyo 10, ang team na namamahagi ay naging abala sa paghahatid ng door-to-door ng mga food voucher upang matiyak na ang mga senior citizen ay mananatili sa bahay. Ang mga senior citizen lamang na nakarehistro sa Office of the Senior Citizens Affairs (OSCA) bago mag Hunyo 22 ang karapat-dapat na makatanggap ng mga food packs.

Maaaring magpadala ng kinatawan ang mga Valenzuelano na lolo at lola upang makuha ang food packs sa pamamagitan ng isang valid ID at ang orihinal na ID na inilabas ng OSCA ng  senior citizen.

Ang mga foods packs ay maaaring makuha sa itinalagang petsa at oras sa site na ipinahiwatig sa voucher upang ayusin ang bilang ng mga tao sa 3S Center kung saan gaganapin ang mga pamamahagi.

Naglalaman ang mga foods pack ng bigas, canned goods, instant noodles, asukal, at isang kahon ng mga tabletang calcium carbonate.