Merchandising store nasunog, P180-M paninda naabo sa Batangas

SUMIKLAB ang sunog sa gusaling kinaroroonan ng Century Merchandising Store sa Apolinario Mabini Avenue, Poblacion 4 ng Tanauan City, Batangas bandang 8:55 ng umaga nitong Linggo.

Ayon sa mga Fire Marshall Investigator ng Bureau of Fire Protection ng Tanauan City, nagsimula ang sunog sa ibabang bahagi ng establisimyento na may mga nakaimbak na mga foam at plastic kaya’t mabilis na kumalat ang apoy sa kabuuan ng gusali, kung saan nadamay din ang isang shopping center, appliances center at iba pang mga tindahan tulad ng ukay ukay at mga cell phone stores. Bandang alas-9:00 ng umaga nang iakyat sa ikalawang alarma ang sunog at pasado alas-1:00 ng hapon ay idineklarang fire out na ang sunog.

Tinatayang aabot sa halagang P180,000,000 ang mga paninda at ari-arian ang nilamon ng apoy.

Wala namang napaulat na mga nasaktan o nasawi.

Inaalam pa hanggang sa ngayon ang pinagsimulan ng pagkalat ng apoy sa nangyaring sunog. (Erichh Abrenica)