Mahigit 150 Kabataan, Sasabak sa IRONKIDS Subic ngayong Sabado

SUBIC BAY — Handa na ang mahigit 150 batang atleta para sa muling pag-arangkada ng RLC Residences IRONKIDS ngayong Sabado, Hunyo 14, sa Subic Bay — isa sa mga inaabangang endurance events para sa kabataan sa bansa.

Itinuturing na training ground ng mga susunod na triathlon stars ng Pilipinas, tampok sa torneo ang mga batang edad 6 hanggang 15 na sasabak sa swimming, biking at running events. Sa boys’ 13-15 division, inaasahang maglalaban-laban ang mga top contender tulad nina Bren Tongco, Kristoffe Nadonga, Nico Cabrera, Juan Rafael Jimenez, Jairus Mejia, Joash Lee Dait, Ralf Prima, at Franklin Billedo.

Hindi rin pahuhuli ang iba pang malalakas na kalahok tulad nina Nathaniel Ablin, Eziequel Estedola, Matt Morales, Iñigo Souza, Joaquin Villaflor, Jose Roque Saludes, at Robin Ortega — lahat ay sasabak sa 250m swim, 6km bike, at 2km run.

Sa girls’ 13-15 category, inaasahang magiging matindi rin ang labanan sa pangunguna nina Dominique Aragones, Margaret Bobier, Danielle Ramos, Kaia Gica, Alaina Bouffaut, Isabela Reyes, at Yuka Nakamura mula Japan.

“Hindi lang ito simpleng paligsahan,” ani Princess Galura, presidente ng Sunrise Events, Inc., ang organizer ng IRONKIDS. “Layunin din nitong hubugin ang disiplina, katatagan, at tiwala sa sarili ng mga kabataang atleta.”

Suportado ng RLC Residences — ang residential division ng Robinsons Land Corp. — ang IRONKIDS, na may adbokasiyang Raising Little Champions para sa wellness, sports at family bonding.

Ang Subic Bay ang host venue ng torneo, na sinuportahan din ng Amlan, Ion Advanced Electrolyte Drink, Salt+Fin, Santé, Manila Bulletin, Tempo, Krispy Kreme, ONE Sports+, Cignal at Sportograf.com. Ang IRONKIDS ay pre-event ng mas malaking Century Tuna IRONMAN 70.3 Subic Bay na gaganapin kinabukasan, Hunyo 15.

Ang mga kalahok ay hahatiin sa mga age-group:

• 13-15 years: 250m swim, 6km bike, 2km run
• 11-12 years: 200m swim, 4km bike, 1.5km run
• 9-10 years: 150m swim, 4km bike, 1.5km run
• 6-8 years: 100m swim, 2km bike, 1km run

May mga relay event din para sa 6-10 at 11-15 age groups, at mga run-only categories para sa parehong edad.

Ayon sa organizers, may 30 kalahok sa boys’ 13-15 division, 32 sa boys’ 9-10, 25 sa boys’ 6-8, at 15 sa boys’ 11-12.

Nagiging mas internasyonal na rin ang IRONKIDS, dahil may mga batang kalahok mula sa France, UK, India, Japan, Ireland, at South Africa.

Para sa karagdagang detalye, bisitahin ang ironkidsphil.com o sundan ang @ironkidsphil sa Facebook at Instagram. (RON TOLENTINO)