Lider ng “Masikat” Gun for Hire timbog sa Quezon

CATANAUAN, QUEZON – Kalaboso na ngayon ang suspek na mayroong patong-patong na kaso ng pagpatay at panghoholdap na may kasamang pamamaslang at tinaguriang lider ng “Masikat” Gun for Hire Group na nag-o-operate sa probinsya ng Cavite at mga katabing probinsya matapos itong matunton at maaresto ng mga pinagsanib na pwersa ng Silang Municipal Police Station at ng Catanauan Municipal Police Station na naghain ng warrant of arrest sa suspek sa lugar na kaniyang pinagtataguan sa Barangay San Isidro ng nabanggit na bayan, Sabado ng umaga.

Kinilala ang suspek na si Saturnino Masikat, nasa hustong gulang  at Top 4 Regional Level, Top 4 sa Provincial Level at Top 2 Municipal Most Wanted sa Cavite na pansamantalang residente sa Quezon.

Base sa ipinadalang report ni Cavite Provincial Police Office (CPPO) Acting Provincial Director P/Colonel Christopher Olazo kay Calabarzon PRO4 A Regional Director Brigadier General Jose Melencio Nartatez, dakong alas-10:30 ng umaga nang madakip ang suspek sa bisa ng dalawang Arrest Warrant na inisyu ng korte sa Tagaytay City para sa kasong Murder at Robbery with Homicide na isinilbi kay Masikat

Pansamantalang nasa kustodiya na ngayon ng Catanauan Custodial Facility ang suspek bago litisin sa korte ng Tagaytay City sa Cavite. (KOI HIPOLITO)