LALAKING SUMISINGHOT NG COCAINE HINDI SI MARCOS – NBI

TALIWAS sa usap-usapan sa social media, hindi si Pangulong Ferdinand Marcos Jr. ang laman ng video kung saan nakita ang isang lalaking “sumisinghot ng cocaine.”

Sa pagsusuri ng National Bureau of Investigation (NBI) sa kumalat na video, nilinaw ng ahensya na malayo sa “facial structures at physical attributes” ng Pangulo ang lalaki sa tinaguriang “polvoron video.”

Sa isang kalatas ng NBI, hayagang sinabi ng ahensya na “edited” ang nag-viral na video, batay na rin anila sa resulta ng Deepware app – isang software na may kakayahan tumukoy ng “deep fake” at “genuine” video.

Una nang binatikos ni Department of National Defense (DND) Secretary Gilbert Teodoro ang nasa likod ng aniya’y bahagi ng panibagong destabilization plot laban sa administrasyon.

Suspetsa ng mga kaalyado ni Marcos, mga alipores ni former President Rodrigo Duterte ang nasa likod ng bigong tangka pabagsakin ang gobyerno.