“FOOD STAMP” PROGRAM KASADO NA SA HULYO (3K pamilya pasok sa pilot test – Sec. Gatchalian

Nakatakdang simulan sa susunod na buwan ang food stamp program ng Department of Social Welfare and Development (DSWD).

Sa Kapihan sa Manila Bay forum, sinabi ni DSWD Secretary Rex Gatchalian na nasa 3,000 pamilya ang makatatanggap ng food stamp sa mga munisipalidad na apektado ng sigalot at kalamidad.

“Were still fine-tuning it kasi nasa loob pa kami ng design stage pero ang ina-identify ng World Food Program (WFP) ay dapat iba-iba sila sa kahit saan na lugar,” aniya sa mga reporter.

“‘Yung isa BARMM kasi former conflict area, mataas ang poverty incidence. Two, calamity-stricken areas that’s why we’re looking at an LGU (local government unit) in CARAGA, and then ‘yung isa hinahanap namin geographically disadvantaged and isolated areas. Ito ay maaaring isang munisipyo ng bundok o isang munisipyo ng isla,” dagdag pa ng kalihim.

Tinawag na “Walang Gutom 2027: Food Stamp Program,” ang proyekto ay naglalayong tulungan ang mga target na sambahayan na tugunan ang hindi kusang-loob na gutom sa bansa.

Nauna nang sinabi ng DSWD na magbibigay ito ng “electronic benefit transfer (EBT) cards” na lalagyan ng food credits na nagkakahalaga ng P3,000 kada buwan para makabili ng piling listahan ng mga bilihin mula sa DSWD registered o accredited local retailers.

Inulit ng opisyal na pinalawig ng Asian Development Bank ang $3 milyon para sa pilot na pagpapatupad nito at sinabing mangangailangan ito ng P40 bilyon para maipagpatuloy ang programa. Nagpahayag din siya ng pag-asa na mas maraming pamilyang Pilipino ang makikinabang dito pagkatapos ng anim na buwang paunang pagtakbo.