FISH PORTER NA NANUTOK AT NAGBANTA SA LOLA, SWAK SA KULUNGAN SA NAVOTAS

ARESTADO ang isang fish porter matapos tutukan at pagbantaan na barilin ang isang lola na napatingin lang sa sukbit niyang baril sa Navotas City, kamakalawa ng gabi.

Mahaharap sa kasong Grave Threats, paglabag sa Comprehensive Firearms and Ammunition Regulation Act at Omnibus Election Code ang suspek na si alyas “Seph”, 36, ng Market 3, Brgy. NBBN.

Sa ulat ni Navotas Police Chief P/Col. Mario Cortes kay Northern Police District (NPD) District Director P/BGen. Josefino Ligan, naglalakad ang biktimang si alyas “Bekang”, 65, ng Yellow Bell St. Brgy.NBBS-Proper, sa Greenzone R-10, Brgy, NBBN, nang makasalubong niya ang suspek dakong alas-11:45 ng gabi.

Gayunman, nilapitan ng suspek ang biktima at tinutukan ng baril sabay pinagbantaan ng “Ano tinitingin-tingin mo diyan? Gusto mo putukan kita?”.

Sa labis na takot ng biktima, nagtatakbong palayo sa lugar hanggang masalubong ang mga tauhan ni Col. Cortes na nagsasagawa ng Simultaneous Anti Criminality Law Enforcement Operations (SACLEO) na nahingan niya ng tulong.

Agad namang rumesponde ang mga operatiba ng ng Intelligence Unit na nagresulta sa pagkakaaresto sa suspek at nakuha sa kanya ang isang hindi lisensiyadong kalibre .38 revolver na kargado ng dalawang bala.