DRIVER, DEDBOL SA RIDING-IN-TANDEM SA MALABON

TODAS ang isang driver matapos pagbabarilin ng isa sa dalawang hindi kilalang mga suspek na magkaangkas sa motorsiklo sa Malabon City, kamakalawa ng hapon.

Agad nalagutan ng hininga sanhi ng tinamong dalawang tama ng bala mula sa hindi pa matukoy na kalibre ng baril ang biktimang si Benjamin Codilan, 58, ng Block 24 Lot 24, Barangay NBBS, Navotas City.

Sa tinanggap na ulat ni Malabon police chief P/Col. Jay Baybayan, dakong alas-12:26 ng tanghali nang maganap ang insidente ng pamamaril sa biktima sa Block 49, Pampano St., Brgy. Longos ng lungsod.

Lumabas sa inisyal na imbestigasyon ng pulisya, sakay ang mga suspek sa isang Honda Beat motorcycle nang huminto ang mga ito sa naturang lugar saka bumaba ang back-rider at nilapitan ang biktima.

Agad bumunot ng baril ang gunman at dalawang beses na pinutukan sa mukha ang biktima na nagresulta ng kanyang agarang kamatayan habang mabilis namang tumakas ang mga suspek patungong C4 Road, Navotas matapos ang insidente.

Kaagad naman nagsagawa ng follow up operation ang rumespondeng mga tauhan ng Malabon Police Sub-Station 5 subalit, nabigo ang mga ito na maaresto ang mga suspek.

Iniutos na ni Col. Baybayan sa kanyang mga tauhan na suriin ang mga kuha ng CCTV camera na nakakabit sa naturang lugar at sa dinaanan ng mga suspek para makatulong sa posibleng pakakilanlan at pagkakaaresto sa mga ito habang inaalam pa ang tunay na motibo sa pagpatay sa biktima.